Otro siman ta habri sin cu sa ken e operador nobo di ex Aura Casino ta

ORANJESTAD – Siman ta habri atrobe sin cu ta conoci ken lo bira operador nobo di loke tabata Aura Casino. Den siman cu a pasa, NoticiaCla.com a tende di presidente di sindicato FTA, Hubert Dirksz, cu nan tampoco no a haya tende nada mas di e caso aki. Minister di labor Paul Croes a menciona algun siman atras cu a logra haya un operador, y cu e siman despues lo a revela e nomber. Pero simannan a pasa y no a tende nada mas. “Nos no sa si algo a bay malo” Dirksz a bisa. Hecho ta cu no tin ningun novedad riba e asunto aki y no por bisa si enberdad cos a tranca, cu no ta tendiendo nada mas riba e asunto.

TRAHADONAN PREOCUPA

Mientrastanto e trahadonan ta na cas, en espera di un tipo di noticia cu por trece trankilidad den nan seno familiar. Minister a priminti cu tur cos lo a drecha, pero for di minister no a tende nada mas, y tampoco di e operadornan. Otro casinonan tambe ta buscando pa sa kico ta kico. “Nos kier sa ken nos competidornan nobo lo ta” uno a bisa NoticiaCla.com den siman cu a pasa. Ta bayendo pa un luna y mei caba cu cos ta status quo, mientras cu e trahadonan (44), ta sin trabou, y no ta pasando den nan miho momento.

CASINO CERA

Tabata fin di aña pasa cu Aura Casino diripiente a cera su porta debi cu cos lo no tabata bayendo bon. Diripiente un total di 44 trahado a keda sin trabou habriendo aña sin un pariba of pabou. Cu excepcion di un grupito, e trahadonan a habri aña na cas. E operadornan tabatin te prome siman di januari pa bandona e lugar, cual a sosode tambe. Despues a dura algun siman mas prome cu por a yega na un operador nobo. A anuncia cu masha fanfaria cu tin un operador nobo, pero te awe e nomber di e operador ainda no ta menciona.