Reuters: CITGO lo no tuma refineria completo over

NEW YORK – Gobierno di Aruba a priminti Valero cu e lo no tin ningun responsabilidad ambiental y no tin ningun obligacion pa desmantela e refineria. Tur ta promesanan segun e agencia di noticia Reuters ta raporta den fin di siman riba negoshacionnan cu e compania petrolero CITGO y e progreso di esaki. Ademas, ta hala atencion cu e raportahe ta papia di e intencion pa restart ‘solamente algun di e unidadnan cu ta procesa petrolio’. Tambe no ta sigur cu Valero lo bende e parti di transshipment, pasobra segun e raportahe ‘Valero no ta mucho dispuesto pa laga esey bay’. Puntonan interesante cu fuentenan cerca di e proceso a confirma na e agencia respeta di noticia Reuters.

INFORMACION SORPRESA

Mayoria di e informacion suministra den e articulo ta conoci caba na Aruba, mientras cu otronan ta bin como parcial sorpresa. E hecho cu no ta bay tuma full e operacion over, sino algun y cu e falta di interes pa laga e transshipment bay, ta bin como sorpresa. Ademas e articulo ta papia di e 25 aña di lease cu gobierno kier cera cu CITGO.

VALERO FOR DI NEGOSHACION

Valero mes no tabata envolvi den e negoshacionnan segun Reuters, mientras cu di otro banda gobierno di Aruba a bisa di a reuni cu nan y a mantene nan informa debidamente. Ta aki e articulo ta referi na e promesanan haci cu ta libera Valero di cualkier responsabilidad ambiental. Algo cu tambe tabata conoci caba.

CONFIGURACION NOBO DI REFINERIA

Ta trahando for di september riba e facilidad su configuracion nobo, incluyendo reemplazo di ekipo. Otro fuentenan ta añadi e informacion cu e proceso pa recluta staf y contratista ta cla pa cuminsa. Esey tambe NoticiaCla.com a raporta recientemente unda cu ta pidiendo personal for di e.o. Venezuela pa por traha.

REFINAHE Y CATALISADORNAN NOBO

Loke segun e articulo, ta haci e operation di CITGO na Aruba interesante, no obstante e situacion financiero pober di PDVSA, ta cu CITGO a disfruta di algun beneficio financiero debi na margennan mas halto di refinahe, cual lo por permiti'e pa dirigi un parti di su ganashi pa Aruba.

A bisa tambe cu e catalisadornan uza na e unidad di hydrodisulfurisacion a wordo kita y otronan ta planea pa wordo cumpra.