Por dura 2 aña prome cu refineria ta cla pa cuminsa opera atrobe

HOUSTON – Mientras cu ta trahando riba un deal pa reapertura di e refineria di Valero cu posibel cumprado CITGO, tur cos ta mustra cu e deal ta bay tarda mas cu a spera. “E fecha di reapertura tin cu wordo stipula ainda” segun un articulo publica pa e agencia noticioso respeta Reuters a bisa. “E unidadnan operacion por dura mas di 2 aña prome cu nan ta cla pa por opera. Esaki pasobra e tempo cu e facilidad a keda para keto, tabata hopi” fuentenan a confia Reuters.

PARA OPERACION

Valero a para operacion di e refineria na 2012 debi na margen pober di ganashi. Na 2014 na a re clasifica e facilidad como ‘abandona’, excepto pa e terminalnan cu ta wordo uza aworaki.

KICO LO PRODUCI

Aruba lo ofrece un bon forma pa PDVSA produci naphtha (likido mixto inflamabel di hydrocarbon) cu e ta actualmente importa como un filtro pa e produccion di petrolio pisa y e lo produci materia prima di refinacion tambe pa CITGO, segun e fuentenan. “Pero ta insigur si e acuerdo lo inclui e terminalnan tambe ya cu fuentenan di e refineria ta bisa cu ‘no kier laga esey bay’."