Documento pa ratifica acuerdo entre Oduber y colega ministernan firma

ORANJESTAD – E desacuerdonan entre minister Otmar Oduber y su coleganan ta pa pasado. E biaha aki pa medio di firma di colega ministernan, ratificando e palabracionnan haci. Mientras cu e acuerdo tabata cla, NoticiaCla.com a compronde cu e documento cu ta establece esey tambe a keda firma pa e mandatarionan di gabinete Mike Eman II. Oduber den un reaccion breve (a priminti di bin bek riba esey), a confirma cu awor si tur cos ta cla y confirma y firma. E mes no a wak e documento ainda, pero a wordo informa cu e ‘protocol’ ta firma pa tur minister. Esey tabata e pida cu ta falta pa por revoca e ‘carta di retiro’ cu tabata riba mesa ainda pa 1 di maart. Pero mucho e mandatario no kier a bisa ainda, te ora cu e wak e carta firma. 

REGLANAN STIPULA

Mientras cu e mandatario a informa algun dia pasa caba cu cos a ‘drecha’ entre e y su coleganan, el a confirma cu e mandatarionan a firma e protocol cu ta stipula con lo sigui traha den futuro. Por a compronde cu algun ‘regla’ a wordo stipula di con ta bay traha den futuro cu otro, particularmente riba tereno cu ta referi e mandatario. A compronde cu pa algo por sosode den area cu ta toca turismo, y un otro minister kier of mester actua of haci algo, mester haya aprobacion di Oduber. Asina tin mas cos cu a keda concretisa riba papel, y cu den e fin di siman aki lo wordo repasa pa e mandatario en cuestion.

COS A REMENTA

Tabata luna pasa cu e situacion a ‘rementa’ di tal forma cu e mandatario a rabia, bay gobernador y presenta un carta di retiro riba mesa, condiciona na cierto condicionnan ‘sino fono’. E situacion tabata basta tenso pa varios siman, y tabatin indicacion cu Oduber lo no a bolbe mas. Cos sinembargo a cambia na caminda cu a pone cu partidonan a papia cu otro y a logra cu no mester a kibra e relacion di hopi aña, sino mas bien a fortifica loke tabat'ey y a crea un base pa sigui dilanti.