Monumento Ike Cohen honrando pioneronan di Aruba su turismo

ORANJESTAD - Diahuebs atardi a celebra e contribucion di e pioneronan den nos turismo cu nan nomber graba na Monumento Ike Cohen cu a wordo inaugura na Plaza Turismo. Minister Otmar Oduber como titular di Turismo a dirigi su mes na e invitadonan presente, entre cual algun di nos pioneronan den turismo. El a indica cu 60 aña pasa Minister Juancho Irausquin hunto cu e Comisionado di Turismo, Oscar Henriquez a bin cu e idea di un hotel luhoso. Cu nan vision, e espiritu pionero y e yudanza di otronan, esaki a bira realidad na 1959 cu apertura di Aruba Caribbean Hotel. Esaki tabata e comienzo di e era di progreso y desaroyo di Aruba cu a planta e simia pa un desaroyo excepcional di nos industria turistico. E la habri caminda pa hopi mas innovado nan, pioneronan y entrepreneur nan den tur area di hospitalidad.

DISEÑO DI MONUMENTO

E monumento Ike Cohen diseña pa Raffy Kock den colaboracion cu PMEC a wordo realisa na honor di e pioneronan di nos industria. E nombernan graba den e monumento ta esunnan di individuonan cu a contribui grandemente na e desaroyo dinamico den diferente aspecto di hospitalidad. Algun a sobresali pa nan vision y liderazgo y nan habilidad pa persuadi, manera Juancho Irausquin y Oscar Henriquez. Otronan cu e mandatario di turismo a menciona cu tabata pioneronan y a tuma riesgonan, manera Wichi de Palm, Ramon Richardson, Harold Malmberg, Raymond Maduro, Eduardo de Veer y Ewald Biemans. Eline Bartels-Daal tabata un innovador di mercadeo. Lloyd Baptist y Jesus Kock cu a habri e porta di entretenimento. Tabatin entrepreneurnan creativo manera Louis Pavlis, Charlie Brouns Senior y Charlie Brouns Junior, Herman Ponson, Chaubin y Maurice Neme y Eduardo Ellis. E pasion y empuhe di Simon Oduber Jr. tabata e fundeshi pa industria di MICE na Aruba. “Na tur e pioneronan cu nos ta honrando awe tardi, hopi danki pa e excelencia cu boso a brinda Aruba”, Oduber a finalisa bisando.