Corte a cambia sentencia di 6 cuidado di preso den nan fabor

ORANJESTAD – Un total di 8 trahado na KIA, cuidadonan di preso a tende nan sentencia wordo reduci drasticamente e siman aki, 2 aña despues cu nan a keda confronta cu castigonan cu ta varia di castigo di prison y otro tipo di castigo. E caso ta data di 2014, unda cu despues di un incidente entre un preso y un cuidado di preso, e cuidado di preso a wordo agredi y cu despues a haya sosten di parti di su coleganan. E coleganan aki sinembargo a haya nan mes dilanti mesa berde pa a defende nan colega. Y husticia no tabatin merced di nan durante e caso. Resultado tabata algun castigo cu sigur a baha pisa riba nan.

TIPO DI CASTIGO CAMBIA

Algun di nan a haya castigo di prison como sentencia, otronan a wordo declara liber, y otronan no por a eherce nan trabou pa un periodo di 5 aña cu a nifica cu varios mester a cambia nan rumbo di sea trabou y of bida. Despues di a apela e caso, Corte di apelacion a trata e caso fin di aña pasa y e siman aki a dicta e sentencia. Corte superior a revoca e sentencianan diaranson unda cu dos cuidado a keda cu nan declaracion di libertad atrobe mientras cu e otro 6 nan sentencia a wordo revoca. Mas bien nan sentencia a wordo reduci na algo menos severo. De hecho, ningun ta haya castigo di prison sino mas bien un tipo di trabou ‘laboral’, conoci como ‘werkstraf’ di 150 ora di trabou.

ARGUMENTO

E argumento tabata e situacion laboral di e trahadonan na KIA. Entre nan, e hecho cu nan ta traha den situacionnan inhumano laboral, manera e edificio y tambe orarionan hopi largo (double shift), cu ta pone cu esaki no por. Corte a hala atencion di e situacion di trahadonan y nan horario. E stress acumula por tin efecto riba e calidad di trabou cu e trahadonan ta traha bou di dje. E cantidad di persona cu tin cu traha, no ta suficiente y esey ta pone cu e tin efecto riba e trahadonan. Como tal Corte a tene debido cuenta cu e situacion aki. E sentencia no ta riba papel ainda segun abogado Sven Faruup a splica NoticiaCla.com, y p'esey no por a reproduci esaki manera ta custumber.