E fin di siman aki waf di carga ta muda pa Barcadera

ORANJESTAD - E fin di siman aki waf di carga ta muda pa Barcadera. ASTEC a anuncia cu tur servicio y operacionnan di waf di carga ta mudando for di Oranjestad pa Barcadera. Entrante dialuna dia 15 di februari 2016 pa 7:00am e compania cu ta maneha y administra carga cu ta yega nos isla cu barco, lo habri su oficinanan na Barcadera. E unico servicio cu lo sigui vigente for di e waf di Oranjestad te un proximo aviso ta e servicionan pa "Car Carriers", esta e barconan cu ta transporta auto.

OPERACION MULTI CARGO DESDE OTRO SIMAN

Despues di mas di 20 aña den planificacion y desaroyo, e vision di Aruba pa muda e terminal di carga for di Oranjestad pa Barcadera lo realisa den e fin di siman nos dilanti. E terminal di barco nobo, di estilo "Multi-Cargo", lo ta operacional pa medio di un partnership entre ASTEC y Aruba Ports Authority (APA) desde otro siman.

MUDANSA DI CONTAINER

Ya den e fin di siman pasa a cuminsa muda tur container bashi pa Barcadera pa asina poco poco cuminsa prepara pa e mudamento completo. E siman aki ta e ultimo biaha cu barco di container lo yega na Oranjestad y desde otro siman lo mira barconan di crucero so na Playa y barconan di carga tur lo descarga na Barcadera.

OPERACION DI ASTEC

ASTEC N.V. ta existi desde september 1983 y ta conta cu no menos di 70 empleado servicial y bon entrena pa ofrece e miho servicio posibel na tur e barconan di carga cu ta mara na nos waf. Anualmente ta descarga entre 300 pa 400 barco di carga. ASTEC N.V. ta partner cu Aruba Ports Authority (APA NV) den construccion, financiamento, operacion y mantencion di e terminal nobo di waf di carga situa na Barcadera. ASTEC N.V. ta e “terminal operator” desde otro siman ora tur operacion di e waf di carga muda oficialmente pa Barcadera.