Ataca mi, pero no mishi cu mi famia si no gusta mi maneho

ORANJESTAD - "Si un hende no gusta mi maneho, nan por ataca mi libremente, pero no mishi cu mi famia", minister di Salud Alex Schwengle a bisa diaranson durante un conferencia di prensa. Indicacion di e mensahe aki tabata e forma con tabata anda cu social media riba e caso di e baby Lunah, cu dado momento a conduci na atake personal riba dje y tambe su famia ."Cuido medico y salud di hende no ta un asunto social, sino ta cos serio. Den mundo medico nos no ta tuma decision basa riba cantidad di likes cu un hende haya riba Facebook", asina Schwengle a bisa. El a lamenta e cantidad di insulto y lastramento cu tabatin riba red social contra specialistanan medico di nos pais, contra Hospital y contra di dje personalmente como Minister encarga cu salud publico.

DOCTER NOBO

Ta parce cu ultimo dianan ta hopi hende a sea bira dokter of diripiente nan conocemento riba cuido medico a amplia di gran forma. Riba Facebook por a lesa un cantidad di opinionnan y sugerencianan cu lamentablemente no ta basa riba realidad di e caso.

PAPIA SIN SA

Pio ainda, basa riba comentarionan di hende cu no sa kico e caso ta encera, mesora a sali un avalancha di atakenan baho contra e pediatranan encarga cu cuido di e baby Lunah y contra e mandatario. Specialmente e grupo conoci tras di "Fake Accounts" mesora a activa y hasta a publica potret di henter famia di e Minister, puntrando e si e lo a actua mescos si tabata su yiunan.

DESAPROBA ACTONAN BAHO

"E tipo di actonan baho asina mi ta desaproba y mi no a drenta arena politico pa esaki. Mi ta un profesional medico y mi ta haci mi trabou teniendo e interes di e pashent na cuenta, pero sin lubida e derecho di e dokternan envolvi. E balans ey ami mester mantene y como tal mi no ta funciona segun chantahe di ningun hende “ . E ta adverti e opositornan politico cu ta sconde tras di cuentanan anonimo riba red social, cu e tipo di actonan baho asina un dia lo bolbe bek y no ta agradabel. "Si un hende no gusta mi maneho, nan por ataca mi libremente, pero no mishi cu mi famia", minister di Salud Alex Schwengle a finalisa bisando.