ATA: Informacion riba Zika saliendo uniforme y bon formula

ORANJESTAD – Segun Aruba Tourism Authority (ATA) informacion riba Zika saliendo uniforme y bon formula . A.T.A. ta den contacto regularmente cu Departamento di Salud Publico pa cu informacion oficial entre otro rond di e virus Zika y su desaroyo. Ta di vital importancia pa A.T.A. y tur socio ta bon informa tocante di tur desaroyo nobo, tanto local como internacional y di investigacionnan y status cu World Health Organization ta anuncia.

PARTICIPANTENAN

Ronella Tjin Asjoe-Croes, C.E.O. di (A.T.A.), hunto cu representantenan di otro organisacionnan activo den turismo a participa na un reunion siman pasa unda cu Aruba Hotel & Tourism Association (AHATA), A.T.A., Departamento di Salud Publico, DESPA y GKMB a duna un presentacion na esunnan presente.

PRESENTACION NECESARIO

E presentacion tabata uno hopi necesario, segun Tjin Asjoe-Croes, como cu a discuti y elabora riba tur e ultimo desaroyonan y pasonan cu ta wordo tuma den e lucha contra di e sanguranan cu ta transmiti e virusnan di Dengue, Chikungunya y Zika. Tambe a informa riba ‘Kico Zika ta’, y a enfoca riba e comunicacion uniforme y ki strategia A.T.A. ta adopta internacional y localmente pa loke ta confirmacion di bishitante nan cu nan no mester ta preocupa.

ROL PRINCIPAL DI ATA

E rol principal di A.T.A. den e "big picture" ta di entre otro "salvaguardia cu e posicion y imagen di e marca Aruba ta wordo proyecta internacionalmente na e manera corecto den e caso aki. Mester sigura cu tur “stakeholders” incluyendo e consumidor tambe ta informa corectamente den e situacion actual, mirando cu tin tambe hopi confusion rondo di e topico aki. Ta un tarea masha importante pa saca informacion oficial, corecto y bon formula den e esfuersonan pa mantene socionan y clientenan den tur mercado y mercadonan potencial pa Aruba, na altura di kico ta e status di Aruba y di kico tur nos ta haciendo pa prevencion.

NO TIN CASO CONFIRMA AINDA

Hecho ta cu no tin ningun caso di Zika confirma positivo na Aruba. E informacion aki ta importante pa nos bishitantenan y bishitantenan potencial y sigur tur partner cu ta bende vakantie, incluyendo producto y servicionan pa Aruba, ta consciente di dje. Si e informacion aki cambia, ta esencial tambe pa e informacion corecto ta disponibel na tur momento, y pa e motibo aki mes, A.T.A. ta den contacto estrecho cu DESPA.

PUBLICACIONAN

A.T.A., AHATA y DESPA a publica un aviso den corantnan local dirigi na e comunidad di Aruba, motivando comunidad pa actua determina pa cu eliminacion di criadero y prevencion di e ampliacion di e presencia di e sanguranan menciona.

INSEGURIDAD

E insiguridad rond di e impacto di Zika relaciona na e transmision di e virus di e mama na estado pa su baby, cual actualmente ta den fase di investigacion intensivo pa mundo medico y WHO, te cu awor a conduci na algun cancelacion di biahe pa Aruba. Tin varios pregunta ta drenta cerca socionan y tur a ricibi di A.T.A. e “statement” oficial prepara pa comparti cu esunnan cu ta pidi informacion. Tambe a ricibi un FAQ prepara pa Caribbean Hotel and Tourism Association hunto cu Caribbean Tourism Organization.