Finalmente ta un prizonero so a huy y wordo deteni cu su complice

ORANJESTAD – Cu detencion di e prizonero Jarod Harold Anthony Schwengle (31) cu tabata fugitivo pa un periodo cortico, e situacion a ‘normalisa’ atrobe na KIA mirando cu no tin ningun otro prizonero mas cu a huy. Inicialmente a raporta cu tin mas cu un prizonero, (a papia di tres)  pero a resulta cu ta solamente un preso a logra huy pa algun ora. Esun cu ta fugitivo ainda ta un di dos persona cu a yuda e preso cu e salida breve di KIA. Den e operacion aki, personal di Warda Costa tambe a asisti. 

UN PRESO SO

Informacion cu NoticiaCla.com tin, ta mustra cu enberdad tres preso a purba, pero ta solamente un a logra bula muraya cu ayudo di dos persona pafo. Dado momento tabatin tres persona cu tabata coriendo, cu a pone pensa cu tabatin tres preso cu a huy. E unico preso pues cu a huy tabata Schwengle, cu mientrastanto a wordo captura atrobe na altura di e pier di Valero.

VERSION DI WARDA COSTA

Mientrastanto Warda Costa ta raporta cu nan mes a haya e melding pa 2’or di merdia di e huida. “Unidadnan di Warda Costa mesora a bay pa e area di Rodgers Beach, pa evita cu e fugitivo lo a hui via laman eynan. Tambe a prepara e ‘unidadnan aereo’ si tabata necesario. Na final, polis den un tempo cortico a sa di pone man riba e fugitivo cerca di e refineria. E homber cu a percura pa e auto di escape tambe a wordo deteni. E caso ta bou di investigacion”. Esey tabata e version di Warda Costa.

REACCION DI MINISTER ARTHUR DOWERS

Minister di husticia Arthur Dowers a reacciona riba e huida di e prizonero aki tambe. E mandatario ta mustra cu fayonan lo a wordo cometi, cu por a wordo evita cu e prizonero por a hui. Scucha e declaracion di e mandatario aki. Fotonan ta cortesia di Warda Costa.