Baby Lunah rumbo pa Cali den curso di dia awe

ORANJESTAD – Baby Lunah ta rumbo pa Cali. Den combersacion cu e mama Liandha Rijksen - Garcia awe mainta na NoticiaCla.com, e intencion ta pa awe mes nan sali rumbo pa Colombia pa baby Lunah haya su atencion medico necesario. "Si, e intencion ta pa awe mes nos bay" Garcia a bisa NoticiaCla.com. Nan tabata atendiendo e ultimo detayenan ainda awe mainta y merdia prome cu nan sali pa Cali.  Riba su pagina di Facebook awe mainta tambe el a participa esaki. . “Nos kier a sigura un y tur cu e contribucionnan haci ta wordo dedica na gastonan pa cu Lunah su salud cu no ta wordo cubri pa AZV” e mama a sigui bisa. Te cu ayera AZV a bisa ainda cu e baby lo wordo trata na Aruba mes, y cu no tabatin cambio den esaki. Mes momento un grupo di pediatra pa medio di un comunicado, lo a informa cu nan tin nan pensamento riba e caso aki y cu no ta trata di placa sino di un milager. E famia a kere diferente, y mientrastanto, ta parce cu baby Lunah lo haya tratamento medico na Cali, Colombia.  A compronde cu awe mainta tambe lo tin un conferencia di prensa di gobierno unda cu minister Alex Schwengle lo duna informacion riba e caso aki. 

GRADICIMENTO

E mama a sigui bisa riba su pagina cu ‘ta gradici tur hende cu di un forma of otro manera a sostene nos y ta sosteniendo nos incondicionalmente pa cu nos lucha pa Lunah su derecho riba tratamento medico.'

MAS DI BABY LUNAH

Manera cu NoticiaCla.com a raporta caba, e caso di e baby cu a nace cu complicacion, conoci como baby Lunah, ta hayando mas y mas atencion. Su mayornan a dicidi di splica mas di su situacion pa por compronde kico e caso di e baby ta. Esaki ta e relato di e famia.

CONOCE LUNAH

Lunah a nace 3 di december. Dia 9 di december a bin constata cu e tin un VSD (AVSD) grandi (buraco na curazon y su hartklepjes ta mucho diki). Na hospital nan a dun'e oxigeno pa un periodo cortico y medicamento pa su curazon. Despues di tres siman a haya resultado cu Lunah tin "Trisomie 18". E asina yama "Edwards syndrome". Bukinan y estadisticanan bieu ta indica cu e expectativa di bida di un baby cu Trisomie 18 ta hopi chikito. Dokternan na Aruba a bisa cu "we gaan niet alles uit de kast halen" paso e tin un defecto di nacemento  y e muchanan aki no ta biba hopi y esey ta e beleid di AZV.

RESEARCH NOBO

Research nobo ta demostra cu muchanan cu Trisomie 18 tin un chens pa un bida mas largo y comfortabel si brinda nan e trato medico necesario y cu e revolucion di medicina tin pa ofrece awo. Lunah ta un ehempel bibo di esaki. Paso cu un simpel remedi cu nan a trat'e cu ne pa su curason, Lunah ya caba ta surpasando estadisticanan y a mustra cu e kier biba.

KICO A PASA 

Dia 15 di januari Lunah a wordo interna cu sacamento y a sospecha cu lo ta reflux of slijm. Nos a pidi pa haci echo y esaki a wordo ignora. Despues di 3 dia, por a bai cas. Diasabra 30 di januari Lunah a keda interna atrobe paso e sacamento a progresa y no tabata wanta nada mas na stoma. Su stoma tabata asina irita cu e ader chikitonan a cuminsa kibra. E dia aki a wordo constata cu e tin un estrechamento di su stoma (maagvernauwing), cual ta stroba e cuminda pasa di su stoma pa su tripanan. E ta un complicacion cu cada baby por haya y cu normalmente ta wordo opera di biaha den un periodo di 2-3 dia. Lunah ta na awa di bida y su condicion ta deteriorando. Dokternan kier a oper'e, pero a cambia plan ora cu a indica cu Lunah mester di neonatal intensive care unit cu no tin na Aruba. E mester di esaki pa su VSD y tambe door di e syndrome, Lunah ta masha delicado. Pero a opta awor pa un tratamento alternativo cu lo mester dura 1 siman pa 'WAK' si e por traha y cu por trece mas complicacion pa Lunah, ora nos a informa di e posibel efectonan secundario. Si acaso e no traha e ora ta bay opta pa oper'e y na Aruba mes. Esaki ta inaceptabel.

SITUACION ACTUAL

Lunah no tin tempo pa ta mas coneu di experimento, Lunah ta bayendo atras, Lunah no por wordo opera na Aruba paso nan no tin e recursonan 'kinan pa yud'e si en caso algo bay robes. Esey nan mes a admiti y ta p'esey no a oper'e na prome instante. Y sintando cu AZV na mesa nan mes a admiti esaki tambe. AZV tampoco no kier copera  y ta bisa cu e dokternan mester duna ok pa Lunah wordo manda afo. Pero nan tambe por intermedia via nan comision medico paso esey nan mes a splica MI, pero tambe ta kies pa no yuda Lunah. Lunah ta hopi cansa y deteriorando cada ora. Esey nan tur y nos tur por wak. Lunah tin derecho riba tratamento medico efectivo manera tur otro mucha y mester bai opera afor.

E convenio cu nan mes a firma (NL/Aruba) pa derechonan di mucha ta bisa cla cu NINGUN mucha no mag di keda nenga nan derecho na cuido medico efectivo y principalmente muchanan special mester wordo brinda e miho cuido cu por ofrecenan y cu bo ta al tanto di dje. Como mayornan, nos mes a haci nos huiswerk caba pa nan y acerca e clinica cu AZV ta traha cu ne na Cali, Colombia y nan ta wardando pa brinda Lunah un chens pa su salud. Te aki e relato di e famia di Lunah.