Muraya cu Donald Trump kier traha costa biyones di dollar

NEW YORK – E muraya cu candidato presidencial Mericano Donald Trump kier traha, a haya un prijs. Segun e magnate, e muraya lo costa 8 biyon di dollar y ta Mexico tin cu paga pa esaki. Despues di hopi speculacion y informacion, porfin el a duna mas informacion riba e muraya, cu segun Trump mester tene ilegalnan pafo di Merca. Esey a bira un di su cabaynan di campaña. Trump a gana e eleccion primario den estado di New Hampshire diamars anochi convicentemente.

E SUMA

“E muraya lo costa probablemente 8 biyon dollar, cu ta un fraccion di loke nos ta perde cu Mexico” Trump a bisa durante un entrevista na e canal MSNBC. E magnate di New York cu ta lidera e encuesta, tabata kier pa Mexico paga esaki. “Nos tin un deficit comercial astronomico cu Mexico. Nos ta haci tanto cos pa Mexico y ta perde un fortuna den comercialisa cu Mexico”. Con el a yega na e suma astronomico, el a bin cu un contesta basta exagera. “Nos tin 2 mil miya di frontera, e ta largo, pero no mes largo cu e 13 mil miya di frontera cu China tin. Nos no mester traha 2 mil miya di muraya, sino apenas 1000 miya, pasobra nos tin barera natural tambe. E ta un calculacion hopi simpel” Trump a sigui bisa. Ademas a mustra cu e murayanan por ta 10 pa 12 meter di haltura.

REFUTA

“Nos no ta bay paga un solo cen pa un semehante muraya kens, y e tin cu sa esey” ex presidente Mexicano Felipe Calderón a bisa den un entrevista cu e canal televisivo mericano CNBC. Foto Cortesia Reuters.

.