Falta poco pa estudio factibilidad pa ferry entre islanan ABC keda cla

ORANJESTAD — Na mei of juni ta bira conoci si e implementacion di un servicio di un ferry lihe entre Aruba, Corsou y Bonaire ta alcansabel. Riba orden di e tres islanan, tin combersacionnan andando cu e stakeholdernan local.

REUNION ENTRE DEPARTAMENTONAN

E oficina di investigacion Hulandes Icasus ta papiando actualmente cu entre otro e servicio di imigracion y douane di e tres islanan y Marechausee di Reino. “E intencion di e rapport no ta pa duna conseho si tin cu bin cu e servicio di ferry, sino pa inventarisa kico exactamente ta necesario riba tereno legal y maneho pa haci un servicio di ferry posibel" Segun Zairo Ruiz, project manager di Fondo Desaroyo Aruba (FDA

FDA TA PAGA

Ta FDA ta paga e investigacion aki. Segun Ruiz, ta e intencion pa den e proximo simannan, e servicio di imigracion y douane papia den e mesun direccion pa loke ta e condicionnan necesario. Un rapport preliminario ta bay e ora pa e paisnan cu a duna e orden pa e proyecto, cu tin cu duna nan respectivo comentario pa por traha un rapport final. “For di e punto ey, e paisnan tin cu dicidi con nan lo tin cu sigui” Ruiz a sigui bisa.

ISLA RIBA

Segun parlamentario pa Democracia Real Andin Bikker (un di esnan cu ta lidera e proyecto), e binimento di un ferry lihe entre e islanan ABC a bin un paso mas cerca awor mirando cu Isla Riba tambe tin interes pa un tipo di servicio asina. Durante e ultimo reunion di parlamentonan (IPKO) na St Maarten, e deseo pa un plan di ferry a keda subraya un biaha mas. Ey tambe a duna orden pa bin cu un estudio di factibilidad.

Caribisch Netwerk. Autor: Ariën Rasmijn