Caso di atraco y tiro riba taxista Gomez ta den corte e siman aki

ORANJESTAD – Diabierna proximo e caso di e atraco riba taxista Ronny Gomez ta tuma lugar. E caso ta data di juli aña pasa, ora cu individuonan a comete un atraco riba dje, lagando e seriamente herida. Mayoria di e sospechosonan ta deteni, y lo tin cu presenta dilanti huez diabierna awor. Ta trata di hobennan di edad hoben entre 16 y 20 aña. E caso inicialmente a bin dilanti dia 20 di november di aña pasa caba.

E INCIDENTE MES

E incidente a tuma luga dia 26 di juli 2015, ora cu taxista a resulta gravemente herida cu un tiro net bou di su wowo. Mayoria di e sospechosonan a keda deteni den luna di augustus. Un di nan a wordo deteni na september y otro na october.

CARGONAN OFICIAL

Segun e documentonan di Corte, e sospechosonan ta wordo acusa di, conhuntamente cu un otro of otronan, ladronicia cu violencia di joyas y/of un cellular y/of un suma di 500 dollar y/of mil florin di un persona riba 26 di juli 2015. E violencia a encera cu a rondona e persona cu cara tapa, a atac'e, a exigi di dje pa e entrega su pertenencianan, a ranca e joyas y e telefon y e placa cu forsa di dje y a tene un pistool riba dje y a los un tiro riba dje, a consecuencia di cual e persona a resulta gravemente herida.