Aviso pa trabou pa CITGO for di Venezuela ta preocupante na Aruba

ORANJESTAD – Un aviso cu ta circulando riba internet/rednan social supuestamente di e compania CITGO, ta creando speculacion y preocupacion. Ta trata di un aviso chikito na Spaño cu number internacional, pidiendo trahado pa 10 tipo di trabou cu mester den e mundo di petrolio. Di otro banda e nomber no ta manera e compania petrolero esta CITGO, sino CIDGO. Sinembargo a bin compronde cu ta trata di e grupo di contratista di Venezuela cu ta preparando pa in traha na Aruba y p'esey e cambio di nomber pa e ta ‘mas of menos mescos’ osea un tipo di subsidiario, y no cu mesun nomber. NoticiaCla.com a compronde den fin di siman for di minister di labor Paul Croes cu, - mientras cu e tambe a tende y mira e aviso-, e no ta na altura di e caso aki, y cu el a manda averigua mas informacion riba esey y ainda no a logra. E loke tin hende indigna, ta cu si esaki ta e compania pa CITGO, cu ta pidi hende afo prome cu pidi trahado na Aruba mes.

COMPANIA REGISTRA NA ARUBA

Mas averiguacion a mustra cu mas sigur ta trata di un compania registra na Aruba cu ta en busca di hende pa traha. Pero no ta conoci si ta pa e compania cu mester tuma e refineria over. A tuma contacto cu e mandatario di labor pa wak si esaki ta parti di e asina yama ‘CITGO desk’ cu e kier a bin cu ne pa cuminsa genera interes y trabou delanta pa ora cu e ‘deal’ cu e compania keda concretisa mas sigur fin di otro luna. E mandatario a desmenti esey pues, y a mustra cu e momento ey e no tabata na altura di e detayes, pero cu e tambe a wordo poni na altura di e caso aki. E email cu ta pidi pa responde ta uno internacional, y e number di telefon tambe. Mientrastanto na Aruba tambe tin un compania mescos registra pa algun tempo caba.