Gary Giordano cu buki riba su dianan di infierno na Aruba

NEW YORK - E mericano cu a perde su amiga na Aruba na 2011, Gary Giordano, a skibi un buki den cual e ta describi e detayenan horendo cu segun e, e la pasa aden. Segun Giordano ta skibi den su buki, e tabata e periodo mas scur den su bida. E la perde su amiga, su so den un pais stranhero, sin asistencia di gobierno mericano y prensa contra dje. Loke mester a bira un vacacion den paraiso, a bira un infierno cu a cambia su bida pa semper den augustus di 2011. E ta conta di e momentonan cu e la wordo aresta, acusa di a asesina su amiga Robyn Gardner den loke tabata parse un estafa pa colecta placa di seguro. Segun Giordano, e la pasa 4 luna di angustia den prison na KIA siendo cu nunca e la wordo acusa di ningun crimen. Giordano ta bisa cu e la skibi e buki pa asina expone e malechornan real y e storia real di e dia ey. E storia ta casi similar na esun di 2005 ora cu e studiante mericano Nathalee Holloway a perde na Aruba na mei di e aña ey, y unda cu Aruba a haya su mes den un luz negativo cu publicidad di prensa mericano. Aki tambe varios persona a keda deteni, y aki tambe e dama nunca mas a wordo haya.