Brandweer cla pa yuda den caso cu tin retonan cu Zika

ORANJESTAD - Como miembro di e Rampenstaf, esta e Team di Calamidad di Aruba, Brandweer tambe ta forma parti di e planning pa cu prevencion di e entrada di Zika y si acaso cu e enfermedad drenta Aruba pa yuda combati'e di biaha. Diahuebs a tuma luga un reunion entre e miembronan di e team aki, esta Polis, Brandweer, Departamento di Salud Publico y Rampenbureau Aruba. Commandante di Cuerpo di Bombero y Rescate, Edward de Cuba ta splica cu e reunion tabata pa intercambia di idea y papia tocante puntonan specifico di atencion den caso cu e enfermedad wordo importa y consecuentemente tin casonan local, pero tambe kico mester wordo haci si e virus bay den un fase pandemico na Aruba.

DIENSTEN PROME YAMA

E diensten cu ta prome yama pa actua a discuti kico nan mester haci, con lo bay haci'e, y con lo ataca e virus pa domin'e mas lihe posibel. E organisacionnan cu ta miembro di e Rampenstaf tin ful Aruba bou di nan cuido den casonan di desasternan natural y otro calamidadnan y tur mester ta na haltura di e status y progreso di Zika y mester sigui tur desaroyo pa ta mas bon posibel informa na tur momento. E enfoke principal, Commandante De Cuba a bisa, ta pa contene y wanta su incidencia mas chikito posibel. Zika no por wordo permiti di stroba e isla di drey manera e ta drey normalmente y e fluho di turista cu ta bin Aruba no por wordo stroba, De Cuba a comenta, añadiendo cu tambe hendenan cu ta biaha pa negoshi mester por sigui haci esaki libremente.

TAREA BOMBERONAN

Cuerpo di Bombero y Rescate no tin un tarea specifico den e lucha contra Zika, pero si tin expertisio den calamidad y tin hopi hende cu por duna un man y yuda haci cierto trabounan necesario. E team di Brandweer ta bastante multifacetico y por tuma bou su encargo cierto tareanan pa yuda of guia procesonan. De Cuba ta splica cu hustamente pa via cu e team ta asina multifacetico por tuma un grupo y forma un ekipo special cu ta ricibi trainingnan specifico y nan por cuminsa haci e trabou necesario di biaha. Cuerpo di Bombero y Rescate ta haci un apelacion riba comunidad di Aruba pa evita criadero rond di cas y si acaso un persona ta sinti sintomanan di Zika pa nan bay dokter pa haya confirma di loke nan tin. Si e caso di e pashent ta duna cualkier indicacion di por ta Zika, e dokter ta tuma contacto cu Departamento di Salud Publico y e pasonan necesario ta wordo tuma. E team di calamidad ta atento pa cualkier indicacion cu por tin un caso di Zika na Aruba pa nan t'ey y ta prepara for di inicio pa maneha e situacion pa e no por sigui y no haya chens pa bay for di control y bira un problema grandi y indesea, De Cuba a conclui bisando.