Jeugdgezondheidszorg: No hiba muchanan bou di cinco aña carnaval

ORANJESTAD - Carnaval semper ta un temporada cu ta rekeri mas planeamento y atencion pa cu e salud y siguridad di nos muchanan. Sea ta na banda of den parada, tin un lista di conseho cu ta "standard" cu ta un recordatorio pa e mayornan y/of otro adultonan cu ta hiba of compaña muchanan pa e paradanan di Carnaval.

PREPARANDO PA CARNAVAL

Preparando pa e ultimo eventonan grandi di Carnaval, Dietista/Nutricionista di Jeugdgezondheidszorg na Departamento di Salud Publico, Endrina Curet ta corda mayornan di e puntonan di atencion principal pa cu e siguridad y salud di nan yiunan.

NO HIBA MUCHA BOU DI 5 AÑA CARNAVAL

Calor, solo, zonido duro, alimentacion no adecua, tur ta factornan cu por afecta e bienestar di un mucha. E di prome conseho cu Jeugdgezondheidszorg ta duna mayornan ta pa no hiba muchanan menor di cinco aña di edad Carnaval. Curet ta agrega cu e tipo di evento aki no ta cuadra cu nan fase di desaroyo. Muchanan cu ta na banda para pa wak parada ta rekeri hopi atencion di parti di e adultonan cu ta compañ'e; e planning pa bay cu un mucha carnaval ta cuminsa un of dos dia prome cu e evento pa asina no lubida ningun detaye importante.

PLANNING DI NUTRICION

E planning di nutricion ta esencial; Curet ta conseha pa hiba suficiente awa, fruta fresco, y sandwich cu un beleg of otro cos cu no ta daña facil. E cuminda mester bay den un ice jug cu ice pa asina e keda riba un bon temperatura. E forma mas facil pa maneha cuminda pa mucha durante di carnaval ta si e cuminda ya ta paketa na e porcion cu e mucha ta bay come, pues den saco of bakinan chikito. IJs cu ta warda e cuminda den dje no ta wordo uza pa bebida, pero mester bay cu un ice jug separa cu ijs unda cu no ta mishi cu mannan sushi pa evita cu e ijs wordo contamina. Awa ta e bebida mas importante pa chikito y grandi keda bon hidrata; juice y refresco tin hopi sucu y no ta kita sed, pues semper tin suficiente awa pa dura henter e parada y encurasha e muchanan pa bebe awa.

DESAYUNO

Prome cu sali for di cas riba dia di e parada, come un bon desayuno na cas y hunta curpa cu "broadspectrum" sunblock por lo menos mey ora prome cu sali for di cas. E sunblock mester wordo hunta atrobe cada dos ora.

SUNBLOCK

Curet ta splica cu mester corda hunta sunblock na tur parti di e curpa cu ta exponi na solo, esta orea, parti patras di nek, e pianan si e mucha no tin keds of sapato cera bisti, y hasta cabez unda cu e cuero di cabes no ta cubri. Un pechi y bon bril di solo cu ta brinda proteccion tambe ta recomenda. Un parasol pa provee sombra ta hopi importante si no tin otro opcion pa e mucha por sinta relaha den sombra. Curet ta recomenda tambe pa semper tin "handsanitizer" y "wipes" pa haci man limpi regularmente y por lo menos prome cu come y despues di bay baño.

EARPLUGS

Un otro "must have" pa preveni daño permanente na orea, ta e "earplugs". Curet ta conseha pa no warda ultimo momento y no pensa cu lo por haya riba e ruta, pero cumpra esaki di antemano y tin'e prepara. Ta bon tambe pa tin mas di un paar pa asina si uno cay semper tin un limpi, nobo pa reemplas'e. Proteccion di e oreanan ta hopi importante, e zonido duro ta peligroso pa oido di mucha y adulto y daño na oido ta permanente. Si un hoben ta den parada conseh'e pa no pega su mes cerca di e speakernan di e banda.

BEBE Y STUUR

Finalisando Endrina Curet a haci un peticion na tur persona cu ta transporta muchanan, sea ta nan mesun yiunan of yiunan di otro persona, pa percura pa nan cu ta adulto no bebe bebida alcoholico y stuur auto pa asina preveni situacionnan cu ningun hende kier experencia. Keda semper den control, y semper percura pa muchanan bisti nan faha di siguridad den auto.