Embahador Union Europeo impresiona cu proyecto Observatiecentrum McC

ORANJESTAD - E Embahador nobo di Union Europeo estableci na Guyana, señor Jernej Videti a bin Aruba pa cera conoci y tira un bista riba e proyectonan cu Union Europeo a pone fondonan disponibel via di onderwijsfonds na Aruba. Ta trata di varios proyecto den e area di Enseñansa, pero a opta pa bishita Observatiecentrum na MDC, un di e proyectonan cu a carga un atencion special di minister Michelle Hooyboer-Winklaar y tur esnan cu a traha pa realisa e proyecto aki.

BISHITA

E bishita na Multidisciplinair Centrum hunto cu Hooyboer-Winklaar pa wak e proyecto cu ta brinda Enseñansa na muchanan cu tin problema severo di comportacion, pero cu alaves tin capacidadnan intelectual halto, a capta e Embahador su atencion.

CONTENTO CU E PROGRAMA

"Mi ta contento con e programa a wordo implementa y e edificio ta uno hopi bunita. Mi por mira cu a mira cu e muchanan ta sinti nan mes hopi bon, nan ta studiando bon y a demostra nan habilidadnan pa asina forma parti di e curiculo di scolnan basico na Aruba. Mi ta hopi satisfecho cu loke mi a mira durante mi prome bishita na Aruba", Embahador Jernej Videti a bisa.

HOOYBOER

Hooyboer-Winklaar a duna e Embahador un splicacion amplio riba e programa, pakico a scoge e modelo aki, plannan pa futuro y tambe e vision en general pa nos Enseñansa. “Mi ta sumamente contento cu nos por a haya e oportunidad pa mustra e Embahador personalmente e proyecto importante aki. Hopi biaha por lesa di un proyecto, pero pa por wak cu su mesun wowo e impacto cu e tin riba e muchanan aki, cu antes no tabata tin e opcion aki, tabata di suma importancia pa por logra mas proyecto via Union Europeo, “ Hooyboer- Winklaar a splica.