Voto contra presupuesto di Lopez y Wyatt Ras tin atencion den AVP

ORANJESTAD – E desaroyo durante e ultimo anochi di tratamento di presupuesto 2016 den Parlamento keto bay ta discusion den comunidad. E reaccion di e fraccion di AVP despues di e votamento di dos di su miembronan, tabata di ‘desapunto, shock y sorpresa’. “E ta haci dolor, claro” tabata reaccion di lider di fraccion di e partido Rene Herde na NoticiaCla.com. Prome minister Eman tambe a bisa cu ‘Na Aruba nos a demostra cu por tin diferencia di opinion den partido, gobierno y parlamento”, tabata un reaccion di e prome minister.

RABIA DEN PARTIDO

Di otro banda, ta conoci cu den seno di partido cosnan ta tur cos menos bon. Fuentenan fidedigno di NoticiaCla.com a mustra cu cos no ta ‘exactamente’ bon den seno di e partido. Fuera di e herida cu e votamento a laga atras, tin rabia entre miembronan di e partido, pero cu nan no por sali bin pafo cu ne aworaki. Noticia cu ‘a cambia lock tambe di un di e parlamentarionan’ despues, a keda desmenti mesora pa e fraccion. “Esey no ta berdad”, NoticiaCla.com a bin tende.

CONSECUENCIA PA E DOS MIEMBRONAN?

Rene Herde a sigura NoticiaCla.com cu e loke a sosode ta meramente democracia bibo den partido y parlamento. “E no ta bay tin consecuencia pa nan” Herde a bisa, refiriendo na e dos miembronan di partido cu a vota contra e presupuesto. “Cerca e otronan ta cambia lock etc.. cerca nos no” Herde a sigui bisa. Pero cu nan ta desapunta, e lider di fraccion si a admiti. “Nos no ta comparti nan opinion” Herde a bisa. Di otro banda, ta respeta e opinion.

PROME MINISTER EMAN

Eman tambe a duna su reaccion despues. “E reunion no a bay sin su retonan y na final el a wordo aproba cu 11 voto na fabor enves di 13 cu ta e fraccion completo di AVP. Dos miembro a scoge pa diferente motibo pa laga un bos critico resona riba sea maneho of riba e hecho si nos ta alcansa e metanan poni riba e normanan cu e presupuesto mester cumpli cune,” Eman a expresa.

NO TA PROME BIAHA

E mandatario a comenta e tema aki bisando cu sigur su deseo tabata cu tur Presupuesto pasa cu e mayoria cu e fraccion tin, pero alaves ta bisa cu esaki no ta prome biaha cu su Gobierno ta pasa den algo asina. Esta cu tin miembro di e fraccion ta bisa cu toch tin puntonan a base di cual nan ta evalua nan voto. Eman den un intendo pa suavisa e asunto, a bisa cu e mes a sinti cu votando na fabor di e mocionnan, e miembronan en cuestion ta bisa di ta sostene e partido, gobierno pero riba cierto punto specifico, riba maneho di un of mas minister, of cifranan di presupuesto tin punto di bista diferente. “Con fastioso cu e por ta, cu no tabatin 13 voto, e tabata otro di e ocasionnan di por mustra cu nos ta un pais y sigur un partido, y un gobierno cu ta wordo dirigi a base di e compromiso di alcansa metanan pa logra Bon Gobernacion y resultado pa pueblo, y un miho calidad di bida pa pueblo. Pero tambe ta realisa cu ta hopi importante pa pone e standardnan cu cual e democracia y e nivel di politica na Aruba por sigui desaroya su mes. Den e contexto ey mi ta kere cu locual a sosode den Parlamento, cu presupuesto a wordo aproba y dos persona a scoge pa tin un opinion diferente, ta keda na nos con pa anda cu esaki. Y distingui entre loke cu a sosode den pasado y e situacion actual unda ta duna e hendenan espacio pa cana nan linea di pensamento y demostra cu esaki ta posibel. Ta importante pa pueblo mira e momento aki den un sentido positivo pasobra nos a aproba un presupuesto cu ta bay cumpli cu e normanan cu nos a pone, cu un deficit di solamente 2 porciento.”