AZV: No a tuma decision ainda riba caso di baby Lunah

ORANJESTAD – Mirando e cantidad di reaccion cu un noticia particular di un baby malo interna na hospital ta hayando riba rednan social, e organo ehecutivo (uitvoeringsorgaan) di Seguro Medico General  (Algememe Ziektekosten Verzekering/ AZV) a emiti un comunicado riba e tema. Mientras cu AZV no ta haci mencion di e nomber segun protocol pa privacidad di famia, ta conoci publicamente si cu ta e baby, -cu tin e nomber baby Lunah-, cu a nace algun tempo pasa cu varios complicacion y mester di ayudo extra pa por sobrevivi. Y via un campaña di e famia, ta pidiendo pa duna placa riba un cuenta bancario pa por manda e baby den exterior.

NO A TUMA DECISION AINDA

“Respetando e privacidad di e mucha y su famia, AZV no por reacciona publicamente riba tur e pregunta y opinionnan riba social media” e organo di seguro medico ta cuminsa bisa. “AZV kier sigura cu e caso aki tin tur nos atencion y di e specialistanan medico cu ta trata e baby”. Ademas nan ta splica kico tur a haci te cu awor pa cu e baby. “Ayera AZV a invita e famia di e baby pa un combersacion. E deseo di e famia ta pa e baby por wordo manda Colombia pa tratamento medico. Normalmente ta asina cu e specialista medico ta haci un peticion, pero a base di e reunion cu e famia AZV a entrega un peticion na e comision di specialista cu ta duna conseho tocante tratamento medico den exterior (CGZ). Representante di e departamento medico di AZV tambe a presenta e caso na dos specialista medico na Colombia pa haya un second opinion”. E organo ta bisa mesora tambe cu “despues di e conseho di e comision, AZV lo tuma su decision final si e baby mester bay den exterior pa tratamento."