Presupuesto aproba 2016 a yega gabinete di Gobernador

ORANJESTAD – E presupuesto aproba pa 2016 a yega gabinete di gobernador diahuebs. Asina director interino di e gabinete Derek Jan Nauta a confirma na NoticiaCla.com diahuebs atardi. “Asina cu e presupuesto ta firma, gobierno (di Aruba) lo participa esaki. Unabes cu e presupuesto ta firma, e ta drenta na vigor y por cuminsa traha segun e contenido di dje." Den pasado na 2014 tabata prome biaha cu falta di un firma di gobernador a causa un consternacion y cu a resulta den un welga di hamber di un prome minister di Aruba, den e caso aki Mike Eman.

PRESUPUESTO APROBA

Despues di 7 dia di tratamento di presupuesto 2016, Parlamento di Aruba a aproba e presupuesto pa cuarto pasa di uno, (01:14 am) diaranson marduga cu 11 voto pro y 10 contra. Prome cu esey a trata no menos cu 28 mocion y un amienda. Di e mocionnan, a aproba 21 mocion, y rechasa 7. For di e mocionnan aproba, tabatin 13 cu a wordo aproba den forma unanime. Y tabatin dos mocion di desconfiansa contra ministernan Arthur Dowers (Husticia) y Benny Sevinger (Infrastructura), cual ambos a ‘sobrevivi’.

SORPRESANAN

Un biaha mas e anochi tabatin momentonan interesante y cu por considera porta como ‘sorpresa’ pa algun cu a hala atencion. Pa cuminsa tabatin dos parlamentario di fraccion di AVP cu a vota contra e presupuesto, esta presidente di Parlamento Marisol Lopez Tromp y Mervin Wyatt Ras. Tambe entre nan, e hecho cu presidente di parlamento Lopez Tromp cu tabata e unico parlamentario cu a vota contra mocion pa reapertura di e refineria. Un otro punto cu a hala atencion di presidente di parlamento tambe tabata e hecho cu e tabata e unico parlamentario di AVP cu a vota pro un mocion di desconfiansa contra su minister, den e caso aki minister Benny Sevinger.

REACCION AVP

NoticiaCla.com a haya e reaccion di lider di fraccion di e partido berde AVP Rene Herde mesora tambe despues. "Cada miembro ta haya tur informacion riba tur tema di gobernacion" Herde a cuminsa na bisa. "Na final, cada miembro ta vota segun su evaluacion personal y su consenshi. Esey ta democracia. Nos ta respeta esey" Herde a continua bisando. "Tambe ora nos no ta di acuerdo cu otro". No ta prome biaha cu miembronan di e fraccion berde a vota contra, ya cu e ultimo presupuesto tambe Lopez a vota contra e presupuesto. E tempo ey tabatin speculacion cu esey lo a nifica tambe su fin como presidente di Parlamento, pero esey no a resulta e caso. NOTA: foto principal ta uno di archivo di e siman pasa cu tratamento di presupuesto.