‘Inside the Thing’ di ‘N Fusion resultando e exito di carnaval

ORANJESTAD – E exito carnavalesco “Inside the Thing” di ‘N Fusion ta resultando e tema exitoso di carnaval 62. Tur cos ta mustra cu e cancion aki lo por bira e ganador di entre otro e road jam di 2016, cu ausencia di e Roadmarch Contest e aña aki. Esey no a stroba e banda di produci un hit cu tur caminda ta wordo scucha. Den anticipacion di e exito confirma aki, e banda a manda un relato cu algun punto importante pa mustra nan punto. “ Ta for di carnaval 2014 caba ‘N Fuzion a sali cu e cancion "One goal" di Ofo Escudero pero cu mayoria hende conoce como "Rubiano mi ta"” e comunicado ta cuminsa bisa. “Den aña 2015 nan a bolbe pega cu e cancion "All I wanna do" di Buddy. Y den aña 2016, e mesun hoben, Buddy” a pega un "mega hit" cu su cancion "Inside the thing". Mientras cu ‘N Fusion ta relata esaki, e berdad ta cu e cancion enberdad a resulta e exito mas grandi di carnaval 62, pa grandi y chikito. Carnavalistanan sin duda a aprecia e aporte di ‘N Fuzion den carnaval 62, specialmente pasobra nan ta entre e poco bandanan cu toch a saca nan produccion, aunke no tabatin Caiso & Soca Monarch e aña aki.

KEN TA BUDDY

Buddy ta e nomber artistico di Jair Vesprey, un hoben di 21 aña di edad, studiante di politica na VU Amsterdam. El a caba su "bachelor" den "Bedrijfseconomie" y awor ta studiando pa logra su "Master" den "Politiekologie". Jair Vesprey a yega di participa y gana den e competencia di Calypso y Roadmarch infantil y hubenil. Na aña 2015 el a participa pa prome biaha den e adultonan y a keda na di dos luga. Particular ta, cu Jair a resulta na di dos luga net tras di su tata Bradley Vesprey "Easy B" cu e aña ey a sali Rey di Soca Monarch. Asina mes Buddy a duna su tata bastante competencia cu su cancion "All I wanna do", compaña pa 'N Fuzion.

HENDRY TROMP

Un di e exitonan tras di e logronan grandi aki ta e compositor y areglista, Hendry Tromp. Su mannan creativo tabata tras di tur tres cancion cu a bira asina exitoso durante carnaval, tanto na aña 2014, 2015 y esun di e aña aki, 2016. Hendry Tromp a start su carera den musica na aña 1996, tocando na hotel. Su prome produccion tabata na aña 2014. E ta forma parti awendia di 'N Fuzion.

INSPIRACION TRAS DI ‘INSIDE THE THING’

E inspiracion tras di e cancion "Inside the Thing" a nace for di e idea mes. E letranan, melodia mara na e areglo a sali for di un inspiracion simpel, pero diseña pa ta un "hit" y pa sobresali riba tur otro. Ta for di luna di november Hendry Tromp a cuminsa traha riba e cantica y tabata dia 1 di januari 2016 a caba cu ne. Buddy a yega Aruba dia 31 di december, a cera conoci cu e cantica dia 2 di januari, a gust'e y grab'e algun dia despues y mesora a bira un exito.