Mayoristanan Hulandes ta ofrece cancelacion pa Aruba pa motibo di Zika

ORANJESTAD – Aruba a cuminsa sinti efecto di e virus Zika, sin cu nos a haya nos prome caso oficial. NoticiaCla.com a haya den su poder copia di un email cu a wordo manda pa algun establecimento cu ta ofrece hospedaje na Aruba, unda cu ta ofrece cancelacion pornada pa esnan cu a book pa Aruba. E mail ta specifica parehanan di cual e dama ta na estado. Ta trata di un compania mayorista estableci na Hulanda, Kras, cu ta avisando su clientenan pa evita un total di riba 30 destinacion popular, cu fuera di Aruba, ta inclui Bonaire y Corsou tambe. Corsou ta e unico di e tresnan cu tin casonan confirma di Zika.

CANCELA BIAHE

NoticiaCla.com a compronde di e establecimentonan na Aruba cu ta preocupa cu e fenomeno aki, ya cu a cuminsa cancela biahenan pa Aruba sin cu tin un caso mes. Informacion cu e lugarnan a haya di e mayorista, pakico ta inclui Aruba siendo cu Aruba no ta tin ningun caso, a haya e contesta cu nan a haya conseho di RIVM, esta e instancia di salud oficial di Hulanda. Pero ora bay riba e site di Rijks Instituut Voor Mileu (RIVM), nan ta haci mencion solamente di e paisnan cu tin caso, manera Corsou enberdad, pero cu Aruba no ta aparece. Pues esaki ta preocupa varios establecimento.

NADA DI ZIKA NA ARUBA

Te cu awe oficialmente ainda no tin ningun caso oficial raporta na Aruba, y e departamento di salud siman pasa ainda a informa cu nan ta trahando duro cu instancianan pa sigura cu tur cos ta bayendo manera mester y segun protocol. Tambe a cuminsa traha cu instancianan di turismo pa alerta hotelnan y otro lugarnan di e posibilidad y pa tuma paso pa evita e criadero di e muskita cu ta plama e virus.