Croes: Otro siman Aura Casino ta firma cu un operador nobo

ORANJESTAD – Aura Casino porfin tin un operador nobo. Diaranson mainta minister di labor, Paul Croes a confirma esaki. E confirmacion a bin directamente for di Gerente General di Barcelo, Lorenso Rubio. Segun e mandatario, ta despues di aproximadamente un luna, hunto cu mediador di gobierno, departamento di labor y sindicato FTA a traha pa logra e reapertura. “Nos sa cu tabata un situacion hopi dificil pa 44 trahado y nos a convivi na tur momento cu tur e trahadornan,” Croes a bisa.

FIRMA ACUERDO NOBO

Na comienso di proximo siman ta bay realisa e firma oficial di e acuerdo y anuncio di nomber di e operador nobo pa ex-Aura Casino.

Negociacionnan a tuma su debido tempo ya cu ta inclui multipel aspecto manera traspaso, renobacion, y naturalmente e deliberacionnan. E titular di labor a gradici enormemente e esfuersonan haci pa tur partido envolvi. Tambe a gradici gerencia di Barcelo, cu tambe a move diligentemente pa haya un operador nobo den e menos tempo posibel y respetando nos leynan laboral. “Bo no kier pa sosode loke a sosode den pasado caminda ta bin un operador nobo cu no ta bay cumpli cu e trahadornan of kizas cu tin un situacion financiero instabil,” e mandatario a bisa. P'esey a asumi e responsabilidad di tuma tempo pa yega na e operador nobo.

LEY LABORAL DI 2013

Esaki ta a base di cambio den ley laboral cu colega Minister Oduber a percura p’e na 2013. Ora cu un compania ta cera y ta wordo tuma dor di otro compania, e compania nobo ta tuma tur lusten y lasten. Como tal e operador nobo pa ex Aura Casino a cumpli y lo tuma tur 44 trahador bek den servicio, sin cu nan ta perde e beneficionan cu a adkiri manera aña di servicio, salario y otronan.

SINDICATO FTA

NoticiaCla.com por a compronde for di e presidente di e sindicato FTA, Hubert Dirksz, cu e ta un poco skeptico ainda, y kier wak e detayes di e acuerdo unabes cu esaki keda firma, pa e por keda trankil. Diahuebs e lo tin un declaracion mas cla riba e topico aki.