Director Parke Arikok: E directiva no ta funciona bon

ORANJESTAD – “Mi ta haya cu e directiva (di Parke Arikok) no a funciona bon y a causa hopi perdida di presupuesto y daño na e Parke”. Palabranan di e director di Parke Arikok Emil ter Horst, cu tabata den un caso den corte dialuna ultimo. E caso tabata pidi pa directiva disolve su contracto di trabou. Huez a duna indicacion kico e lo dicta dia 1 di maart proximo den caso di e director. Por lo menos segun e director a splica NoticiaCla.com. Aki tin cu compronde segun ter Horst cu huez lo mas sigur bay den direccion di disolve e contracto debi cu no tin confiansa entre partidonan.

LAMENTA CASO CONTRA DJE

Ter Horst den un declaracion pa e portal aki a mustra cu e lo purba bringa esaki mirando cu e ta sinti cu cos no ta bayendo corecto. E unico punto trata dialuna den e caso cu e directiva a entama, ta cu nan no tin confiansa mas den e director. “Mi ta lamenta esaki hopi pasobra e trabou ta uno hopi dushi” ter Horst a bisa. Pero los di esey, tin hopi trabou cu ta bayendo hopi bon. P'esey el a entama un caso contra directiva, cual caso lo mester tuma lugar riba un fecha ainda no conoci.

PROBLEMA TA CU GREG PETERSON

Segun ter Horst, parti di e problema ta debi na e caracter di e presidente di directiva di Parke Arikok esta Greg Peterson y su persona. “Di un of otro forma, nos caracter ta dal contra otro. Ami kier ta transparente pa cu e trahadonan y otronan, y mi kier sa mi a trapa su tenchinan mas cu un biaha” e director a sigui bisa. Directiva a bisa hopi cla tambe cu no tin confiansa den su persona. E director a sigura cu e por sigui traha te cu por lo menos 1 di maart, ora cu huez dicta sentencia. Mientras cu e lo sigui traha, e lo no cuminsa cosnan nobo si, asabiendas cu e directiva no lo kier esey.

E POSIBEL VEREDICTO

Ora cu e veredicto bira conoci, ter Horst lo por haya su retiro mesora of e por haya un periodo di un luna pa caba su trabou. “Mi mes ta spera cu lo por tin un of otro tipo di mediacion di porta banda di politica. Si nan tuma nota di mi defensa, nan lo mira cu e ta cuadra cu berdad” ter Horst a bisa indicando cu loke el a haci semper tabata lo corecto. E trahadonan kier sigui cu ne, y a demostra esaki tambe hopi cla. De hecho e la tuma nota di un accion di trabou cu a tuma lugar dialuna ultimo unda cu nan a protesta pro e director. Algo cu sigur ter Horst a aprecia.

SCUCHA TRAHADONAN

Pa loke ta e directiva, ter Horst ta haya cu e nan no ta scucha e trahadonan suficiente. E trahadonan a manda un carta pa e directiva, cual carta nunca no a wordo atendi segun ter Horst. Cosnan cu sigur no por. E si ta mustra cu e si tin e trahadonan na pecho y kier nan bon.