Lopez: Minister ta duna leve indicacion cu ta sostene ilegalidad

ORANJESTAD – Tanto presidente di Parlamento Marisol Lopez Tromp, como fraccion di MEP tabatin  palabra fuerte pa algun minister di gabinete Mike Eman II durante tratamento di presupuesto 2016. Specificamente minister di infrastructura Benny Sevinger. Ya na final di e votamento, net prome cu vota pa e ley di presupuesto mes, Lopez a hala atencion di Sevinger di Infrastructura, aunke no a mencione pa nomber. Lopez a papia riba leynan y maneho cu e minister mester atene su mes na dje, y cuida nan tambe y ehecuta. “No por ta asina cu tin minister of ministernan cu por duna e leve indicacion cu e ta sostene ilegalidad of leynan cu e mester cuida, y no atende su mes na dje” Lopez a bisa, refiriendo na e.o. e minister di infrastructura. A mustra cu p.e. lo tin departamentonan cu no ta traha den un forma transparente siendo cu nan ta esnan cu tin cu conseha e mandatarionan pa tene nan mes na nan maneho. Aki e ta referi na e departamento di infrateam.

MOCION DI DESCONFIANSA

Esey tabata obvio tambe mirando cu algun rato prome durante e votamento pa mocionnan, tabatin un mocion di desconfiansa entrega pa fraccion di MEP, cu ta uno contra e.o. e minister di Infrastructura Benny Sevinger. Lopez tabata e unico miembro di fraccion di AVP cu a vota pro e mocion aki, hunto cu fraccion di MEP. Manera ta conoci e mandatario no ta contento cu maneho di Sevinger riba asunto di tereno, unda cu den un caso cu ta toke personalmente, e mandatario lo no a actua corecto riba e caso aki. Huez na dos occasion tambe a hala atencion di e mandatario na e occasion ey. E fraccion di MEP mes, mas prome a entrega e mocion di 2 pagina, cu un bijlage di 24 pagina di prueba y motivacion, contra e mandatario di infrastructura. Lesa e contenido di e mocion contra Sevinger aki.