Detencion di ex militar cu a maltrata taxista a keda prolonga

ORANJESTAD – Detencion di e Mericano Patrick.S.M.(30) a keda prolonga cu 8 dia e siman aki. Ta trata di e homber cu a comete maltrato violento contra un taxista di edad, pa despues horta su auto. E ta e caso mas comenta e dianan aki na Aruba, mirando kico tur e homber a haci cu e dama Arubiano cu ta den cuido intensivo ainda di hospital. Ministerio publico a confirma cu ainda e homber ta deteni y cu e investigacion ta andando. “E ta wordo sospecha d ladronicia cu violencia, cu lesion fisico grave como consecuencia. E sospechoso ta den detencion actualmente y e investigacion ta andando” Ann Angela, vocero di Ministerio Publico a confirma na NoticiaCla.com.

EX SOLDAT MERICANO

Informacion cu NoticiaCla.com tin for di fuentenan policial, ta cu e persona aki ta un ex soldat Mericano cu a bringa na Iraq y ta parti di un grupo cu ta cla pa combati ISIS mundialmente. A compronde aunke no por a confirma, cu e persona aki tin problema unda cu di un momento pa ora, por switch di caracter y bira violento. No ta conoci si esaki tin di haber cu su pasado militar, ni si e ta un otro tipo di problema cu e por tin.

KICO A SOSODE

Hecho ta cu e lo a abusa di un dama di edad taxista den oranan lat di marduga e siman aki, pasa auto riba parti di curpa di e taxista y hui cu e auto di e dama. Fuentenan policial a mustra cu e persona aki tabata envolvi den un persecucion cu a resulta malo pa e homber ora cu dado momento el a hay'e den un ‘callejon sin salida’, esta un caminda sin salida.

RABIA DEN COMUNIDAD

Notabel ta e rabia cu tin den comunidad pa cu e persona aki y a cuminsa un campaña riba rednan social contra di e persona aki. Tambe tin hopi peticion pa medionan Mericano publica e storia aki, pa mustra kico e Mericano a haci. Hopi ta considera cu tempo cu tabatin e caso di e dama Mericano Natalee Holloway, con prensa Mericano a lastra nomber di Aruba acusando un Arubiano di a mata un Mericano, cu esaki awor ta bira y cu e biaha aki ta un Mericano ta abusa di un dama Arubiano, y riba dje uno di edad. No ta conoci si prensa Mericano a mustra interes den e caso aki.

GRUPO DI TAXISTA

Un grupo di taxista a bin dilanti dialuna pa pidi pa un tipo di asistencia pa damanan taxista, sigur despues di cierto oranan di anochi. Minister di husticia Arthur Dowers a duna di conoce cu e lo sinta cu e taxistanan despues di tratamento di presupuesto, pa wak kico exacto nan preocupacion ta. A compronde cu kier pa ‘arma’ e damanan cu p.e pepper spray como defensa, pero mester mira bon con lo anda cu esaki ya cu pa ley, e no ta un arma ‘legal’ ainda. Lo determina kico e miho paso ta, despues di reuni cu e taxistanan. Aki por lesa una articulo di Seattle times cu a wordo publica comienso di aña pasa riba e persona aki. Foto di portada a wordo tuma di Facebook.