Plasterk a cambia di posicion riba ‘geschillenregeling’

PHILIPSBURG – Conseho di minister di Reino no por pone un decision di un comision di disputa (geschillencomissie) un banda, a lo menos cu tin un motivacion apropia. Esey tabata e punto di bista di minister Hulandes Ronald Plasterk (Asuntonan di Reino) cu ela comparti diamars merdia na final di su bishita di trabou na St Maarten. Recientemente ainda Plasterk a bisa cu conseho di minister di Reino durante conflictonan den Reino semper mester tin e ultimo palabra.

SEPARA AINDA DI OTRO

Loke cu ta separa Plasterk ainda di e gobiernonan di St Maarten, Aruba y Corsou, ta e pregunta cua instituto tin cu ta encarga cu e ehecucion di e geschillenregeling. Plasterk kier pa Raad van State keda encarga cu esaki, mientras cu e islanan tin preferencia pa Hoge Raad, pasobra esaki ta mas separa di politica.

SIMAN PASA

Tabata apenas siman pasa cu gobierno Hulandes a informa cu nan ta sigui para ariba nan solucion pa un 'geschillenregeling' manera anteriormente presenta. E mandatario responsabel pa Reino Hulandes, Ronald Plasterk a contesta presidente di 'Tweede Kamer'  siman pasa, den un carta cu el a informa Minister-presidentnan di tanto Aruba, Corsou y St Maarten caba, cu su pensamento riba esaki. Esey ta inclui entre otro e posibilidad pa un areglo definitivo, pa medio di un 'Rijkswet'. Hunto cu esey, e mandatario ta stipula e puntonan respectivo acerca. E proposicion no ta desvia di e proposicion anterior, cual anteriormente tambe a keda rechasa pa e 4 Parlamentonan.

PROPOSICION DI PLASTERK

Entre nan ta duna contenido na articulo 12a di Statuut, cu ta regula esey. Tambe den caso, cu un pais tin un keho contra un decision di Conseho di Minister di Reino, por discuti riba esaki. Si esaki no conduci na un acuerdo, e pais en cuestion por acudi pa un ‘resolucion di conflicto’. Esaki por sosode den un termino di dos siman. Ora cu e conflicto a wordo presenta pa e resolucion di conflicto, e presidente di Conseho di Minister di Reino ta presenta esaki pa 'Raad van State'. E obhecion di e respectivo pais, lo wordo tuma integralmente. Aki 'Rijksministeraad' por dicidi, teniendo cuenta cu e conseho di 'Raad van State'. Por desvia di e conseho di 'Raad van State' solamente cu un motivacion. E decision final, y e conseho di 'Raad van State', lo wordo haci publico mesora despues.

REUNION IPKO

Tabata despues di e ultimo reunion di IPKO (Inter Parlementair Koninkrijksoverleg) na St Maarten, cu segun e ‘lista di palabracion’, cu e cuater Parlamentonan di Reino a haci un yamada, na e cuater Gobiernonan di Reino pa presenta un proposicion conhunto y desaroya, segun e puntonan di salida di IPKO, di mei 2015 riba e 'geschillenregeling'. Y conforme esaki, Plasterk a contesta e carta mesora. “Mi ta di acuerdo cu e importancia di un 'geschillenregeling' y como tal ta duna oido na boso peticion, pa bin na un proposicion conhunto y desaroya pa un areglo di disputa."

PARLAMENTONAN NO TA DI ACUERDO

E cuater Parlamentonan no ta di acuerdo cu e proposicion aki, ya cu nan ta insisti cu Corte Supremo (Hoge Raad) mester dicidi riba esaki y e mester ta un decision ‘bindend’. Algo cu Hulanda su Gobierno no ta di acuerdo cu ne. Di otro banda, Parlamentario Hulandes, Andre Bosman a mustra cu e ta haya e proposicion di Plasterk ‘perfecto’. Lesa e carta di Plasterk aki.

NOTA: E prome parti di e storia actualisa ta di nos partner Caribisch Netwerk y autor ta Hilbert Haar. Foto ta di Leo Brown/Today