E Arubiano cu a yuda produci un pelicula nomina pa gana e premio Oscar

LOS ANGELES – Mientras cu e ta kere den e proyecto, e no a spera nunca cu e produccion cinematografico cu el a forma parti di dje esta “Day One”, lo a haya un nominacion pa e premio cotiza den mundo di cinematografia, e estatua chikito di oro, conoci como e Oscar. Joseph Cohen Henriquez (27), ta e unico Arubiano formando parti di un team cinematografico profesional Mericano cu chens pa e premio cotiza. Jo, manera e ta wordo yama, ta bin di un famia conoci na Aruba. Su tata ta un comerciante reconoci, y su mama ta mas conoci den e mundo farandulero. Pero e logronan di Jo, ta di Jo so, sin ningun ayudo. Algo cu e mes a logra. Pa conoci cu su mayornan por ta localmente, Jo ta practicamente un desconoci pa nos. Y esey lo por cambia awor. Cu e nominacion aki, su nomber ta bira uno internacional y por pone riba e plataforma universal cinematografico, den cuestion di dias, si e pelicula gana e premio of no.

NOMINACION PA E OSCAR

Tabata dos siman pasa ora cu e nominacionnan pa premio Oscar a bira conoci, cu Henriquez a tende cu e produccion cu e ta forma parti di dje, a cay den e nominacion. Mientras cu e tabata sa cu nan tabata riba e ‘short list’, (10 nomber di varios cu por wordo selecta), ta 5 ta wordo scohi finalmente pa e nominacion. “Mi tabata sa cu nan lo a anunci’e e diahuebs (marduga ey) 5:30am ora di Los Angeles. Pues pa ora mi a lanta, mi telefon tabata yena cu mensahe y tambe riba Facebook” Henriquez a conta NoticiaCla.com. De hecho, hopi hende parti Oost di Merca y na Aruba (pa motibo di diferencia di tempo) tabata sa prome cu Jo di e nominacion. “Mi tabata hopi emociona pa e bunita mensahenan y sosten cu mi a ricibi. Mi echt no a spera esaki!” Jo a sigui bisa. Mientras cu ainda e proyecto no a gana e premio mes si, e nominacion ta grandi. “E ta nifica hopi! E ta un honor increibel” Jo a splica. Y pa un hende compronde esaki, Jo ta splica un poco mas. “Bo sa, bo ta traha pelicula pa un publico. Tur cos cu bo haci, e anochinan sin drumi, e yamadanan madrugador, e movecion constante, bo ta bringa constantemente den e produccion pasobra bo ta spera y kere cu na final tur bo trabou duro lo por desemboca den un miho storia, y cu e lo ‘afecta’ un audiencia, y cu suerte, cambia nan bida un poco.” Jo ta conciente cu esey ta zona poco dramatico, pero e no ta papiando di bida, sino cambiando diferencianan. “Si bo por pone hende hari maske ta pa un rato, bo a haci e diferencia den nan bida” Jo ta sigui bisa. “Un pelicula no por sin su publico, pues pa ricibi un reaccion asina grandi y un reconocemento di e publico ta e miho sentimento di mundo” Jo ta sigui bisa.  

ALGO MAS DI JO

No laga e edad hoben di Jo (27 aña) gaña bo. Pa e edad ey, ya e tin un sin fin di produccion riba su nomber. Sea el a origina un produccion, asisti, dirigi of tin algo di haber cu ne. Esey riba su mes, y pa su edad hoben ta un logro cu hopi hende na Aruba mester ta orguyoso di dje. Considera cu ya caba Jo a maneha un total di 6 miyon dollar den multipel produccion.

MUDA PA LOS ANGELES

Pa un persona asina por ta exitoso den e mundo ey, e mester ta ubica na e mecca di pelicula, esta Los Angeles. Na 2012, el a move eynan pa sigui cu su Masters na e prestigioso academia di American Film Institute, y nunca mas a bandona e sitio. Cuater aña despues, exitonan cu Jo a participa den dje ta inclui peliculanan manera PRISM, KNUCKLEHEAD, y e la fungi tambe como ‘Line Producer’, ‘Production Manager’ of ‘Production Coordinator’ pa un cantidad di produccion, incluyendo TENURED pa FOX Digital Studio, DISMISSED pa Boulderlight Pictures, y peliculanan internacional manera PAPA pa China Film Group, y esun Hulandes ‘Alles is Familie’. E peliculanan tur a bay den mas di 50 festival renombra manera AFI Fest, Tribeca Film Festival, Telluride, Dances with Films, Las Vegas Film Festival y Aruba International Film Festival. Banda di produccion di pelicula, el a produci eventonan manera concierto, red carpets, y tabata educador pa e youth summer camp Art Rules Aruba. Pa e por a yega asina leu, Jo mester a studia tambe y tin como resultado, un MFA di American Film Institute unda cu el a wordo entrena pa Marie Cantin, y tin un BFA di NYU’s Tisch School of the Arts.

JO SU ENVOLVIMENTO DEN E PROYECTO

Den e proyecto cinematografico pa cual el ta forma part, su funcion ta un line producer. Mientras cu tin hopi forma pa splica su funcion, e ta responsabel pa henter e produccion fisico di e pelicula, pero e mester sostene e vision creativo di e director. Pues ta importante pa nan dos ta riba e mesun liña. Ta importante pa e line producer tin un bon comprendemento di e storia y e vision di e director. E tin cu percura pa tur parti di e produccion ta den balanse y ta funciona bon.  

BREAK OF NO

Jo no ta considera cu el a haya un ‘break’ pa ta unda e ta aworaki. De hecho, e no ta kere mes cu un hende ta haya un ‘break'; Hendenan ta traha duro hopi tempo y hopi tempo hende no ta wak esey, sino te ora cu di un dia pa otro, e produccion cu bo ta parti di dje, bira un exito. E ta considera si cu e tin suerte pa ta haciendo algo cu e ta stima y cu e por ta trahando cu hendenan asina increiblemente talentoso.

KEN TA GANA E OSCAR?

Si e produccion cu Jo ta forma parti di dje, gana e Oscar mes, no ta e ta hay'e, sino e escritor/director Hank (Henry Hughes). No obstante esey, tin henter un ekipo su tras. Nombernan manera Michael Steiner, e editor Anisha, Benji e diseñado di e produccion y asina Jo ta sigui menciona un lista di persona cu ta parti di e team.

FUTURO PA ARUBIANONAN DEN MUNDO CINEMATOGRAFICO

Segun Jo, tin futuro pa mas Arubiano forma parti di e mundo aki. Cualkier hende cu acceso na un iPhone y internet por bay y traha algo y haya 1 miyon views riba YouTube y e ora bo por wordo reconoci pa agencianan di talento manera WME y CAA. Jo a wak esey sosode hopi biaha. Compara cu resto di mundo, Jo ta considera Aruba como un lugar spectacular pa traha algo asina y comparti’e cu resto di mundo. Pues si, tur hende manera Jo, tin e chens pa un dia tambe ta unda cu Jo ta aworaki. Y ainda falta, pasobra pa Jo, e ta apenas na e comienso y tin un caminda hopi largo su dilanti.

FUTURO DI JO

Pa loke ta Jo su futuro, e ta mira su mes trahando mas pelicula riba pantaya grandi, y tambe te hasta pa television. Tin hopi escritor, productor y directornan talentoso cu tin hopi bon idea cu Jo lo kier traha cu ne. Pa awor e kier traha un reputacion fuerte como productor y cu hende lo kier traha cu ne.