Polis Hulandes uzando aguila pa combati uso ilegal di drone

DEN HAAG – Criminalnan y teroristanan cu ta uza drones pa nan plannan criminal. E ta algo cu agencia di seguridad Hulandes ta tene cuenta cu ne. Un di e medidanan cu polis ta seriamente evaluando ta pa uza pahra (specificamente aguila) pa combati e uso ‘ilegal’ of ‘no corecto’ di drones. Drones ta e aparatonan moderno popular cu por bula estilo di helicopter y cu por wordo maneha for di distancia. E ta un vehiculo hopi popular y util pa e.o. saca potret y video for di laira. Pero mescos cu e ta popular pa esey, e ta wordo uza tambe den areanan di guera pa paisnan cu por tira di distancia of haci otro actonan sin cu tin perdida di bida, door di uza e aparato aki.

ENTRENAMENTO DI AGUILA

Entrenamento di e aguilanan aki pa un compania specialisa, ta den pleno ehecucion aworaki na Hulanda. Mientras cu e proyecto ta keto bay den e periodo di prueba, polis ta mira e efecto y e uzo como un posibilidad hopi real den futuro. Por lo menos segun un vocero di polis na Hulanda. E aguilanan ta wordo entrena pa mira e drone como un victima of presa, y ta bula, gara e drone y trece na un lugar sigur.

UZO DI METODONAN

Tanto polis, e coordinador nacional pa combatimento di terorismo y seguridad hunto cu defensa ta trahando basta tempo caba riba metodonan contra drones. Uzo maligno di un drone por conduci na kiebro di orden y seguridad, transporta cosnan ilegal di un lugar pa otro, of den caso extremo, comete un acto terorista.

UNDA DRONE NO POR BULA

”Tin situacionnan unda cu un drone no por bula. Esey casi semper tin di haber cu seguridad, segun Mark Wiebes di unidad di polis terestre. “Tabatin un caso unda cu un trauma helicopter no por a aterisa pasobra un hende tabata bula cu un drone riba e sitio”. Uzo di aguila ta un di e hopi posibilidadnan cu ta wordo sondea. E otro metodonan ta mas ‘high tech’. Otro posibilidad ta uzo di un otro drone cu por lansa un net pa gara e ‘drone maligno’. E video di con un aguila ta gara un drone, a bira hopi popular rond mundo e siman aki. Varios agencia noticioso ta raportando e metodo Hulandes aki.

UZO DI DRONE NA ARUBA Y CORSOU

Na Aruba uzo di drone ta conoci pa varios aña caba. Un grupito chikito di hende ta uzando drone pa mas di 4 pa 5 aña caba, pero e ultimo lunanan e interes a aumenta unda cu por a nota benta di e drone aumenta basta hopi. Tin un grupo di entre 30 pa 40 drone operacional na Aruba, unda cu mayoria di nan ta pa metanan comercial, sea pa agencianan di publicidad, oficina di architect y agencianan di noticia. NoticiaCla.com a compronde cu hopi turista tambe ta interesa pa cumpra drone na Aruba durante nan bishita. Tin un variacion di drone y varios lugar na Aruba a cuminsa bende e drone nan aki cu ta varia di prijs di entre 150 pa uno chikito simpel te na 7200 pa uno profesional mas grandi. Na Corsou, polis a cuminsa sondea e posibilidad pa busca entre 10 pa 15 drone en bes di uzo di helicopter pa por yuda combati crimen. Por mira e video di e entrenamento di un aguila pa gara drone aki.