Tweede Kamer a trata presupuesto di Aruba awe

DEN HAAG – Gobierno Hulandes ta preocupa cu e situacion di presupuesto na Aruba. Asina minister a.i. di Reino Hulandes Stef Blok a contesta parlamentario Andre Bosman (VVD) durante e asina yama ‘vragenuurtje’ awe merdia den Tweede Kamer. Bosman tabata un di e parlamentarionan cu tabatin pregunta, specificamente riba e tema di presupuesto laat cu tin atrobe y e palabracionnan cu Aruba no ta cumpli cu ne. Bosman a declara despues na NoticiaCla.com cu e ta satisfecho cu e contestanan cu el a haya di e mandatario Hulandes. “E declaracion cu e mandatario a haci ta hopi importante. E no ta un declaracion sin mas” Bosman a bisa. “E minister a bisa cu gabinete ta comparti cu e ta preocupa cu e situacion di Aruba”, Bosman a sigui bisa.

GOBIERNO TA PREOCUPA

Bosman tabata prome orado awe merdia ora di Hulanda, unda cu a haci e mandatario un serie di pregunta. E mandatario a comparti e pensamento di Bosman, indicando cu ‘Gabinete ta comparti e preocupacion aki”. Aunke cu e contesta no ta ‘nada nobo’, pa Bosman tabata importante pa tende cu ‘gabinete ta preocupa cu e situacion’. “Esey ta un declaracion hopi importante. E ta nifica cu aki rato ora cu e presupuesto, aproba of no, no ta cumpli cu e exigencia (di CAFT), e gabinete aki y gobierno di Reino lo bay atende esaki seriamente!”

CONSEHO NO NEGATIVO DI CAFT

E hecho cu CAFT no ta duna conseho negativo contra pais Aruba pa incumplimento di e deadline poni di 1 di februari, ta di lamenta segun Bosman. “Mi a informa minister cu Aruba ta wordo goberna pa 5 aña caba pa un partido. Nan a haya tur tempo pa trece e finanza na ordo. Esey tabata su promesa tambe. Y awor bo tin cu constata cu biaha tras di biaha esey no ta logrando y ta straño cu cada bes nan ta haya un tempo extra, pasobra nan ta haya cu nan mester di mas tempo. E ta incapacidad of rechaso pa cumpli” Bosman a finalisa bisando.