Cruz ta gana Trump, Clinton y Saunders ta empata na Iowa

DES MOINES – E senador di Texas, Ted Cruz a gana e prome ‘eleccion’ pa caminda pa bira e candidato republicano pa presidencia Mericano, y Hillary Clinton y Bernie Saunders tabata den un empate te na final dialuna anochi na 50-49%. E sorpresa a keda Donald Trump un biaha mas cu mientras cu e no a gana e ‘eleccion’ den e estado di Iowa, pa un persona cu nunca no a participa den un eleccion, a haci un bon papel. “Mi ta stima Iowa, mi a bira e di dos, y otro siman nos ta gana New Hampshire” Trump a bisa den un discurso hopi cortico pero al caso y -, pa standard di Trump-, hopi decente. Algun candidato manera ex gobernadornan Mike Hukabee( R) y Martin O’Malley (D) a retira nan candidatura debi na e resultado malo cu nan a sufri dialuna anochi.

CAREDA MUCHO CERCA

Clinton y Saunders cada uno a papia pero ningun a bisa cu nan a gana, ya cu e momento ey ainda e diferencia tabata mucho chikito pa por a determina un ganador. Y ningun di dos kier a comete e fayo di declara algo prematuro pa despues bira bek. E sorpresa tambe tabata Marco Rubio cu aunke na di 3 lugar, sigur a bira un contenedor pa e proximo caredanan. Otro siman e proximo ‘eleccion’ ta den e estado di New Hampshire. Historia ta recorda cu den pasado, incluyendo actual presidente Barack Obama, esnan cu a gana e eleccion di Iowa, a bin perde esun di New Hampshire, pues tur cos ta posibel. Eleccion Mericano ta e di dos diamars di november e aña aki.