Sevinger: Gobierno lo no apela sentencia contra Ocean Z hotel

ORANJESTAD – Gobierno no tin intencion pa apela e prome sentencia di januari den caso di Boutique Hotel Ocean Z. E mandatario en cuestion Benny Sevinger a splica cu abogadonan di gobierno a recomenda contra esey. E otro sentencia ainda no ta conoci si lo apela esey (e caso di e otro grupo di persona cu tambe a haya un sentencia na nan fabor, contra gobierno). Ademas e mandatario a sigura cu lo respeta e decision di huez. “Si tin cu cambia un decision, lo cambia un decision” Sevinger a bisa riba e decision cu huez a duna.

MAS CAMBIO DI DESTINACION?

E mandatario a bisa cu e decisionnan cu a wordo tuma, no ta personal y cu e no tin ‘ningun belang’ den e decisionnan tuma. Ademas e hecho cu despues cu huez a dicta sentencia contra gobierno y cu toch gobierno a otorga mas cambio di destinacion di tereno tin su splicacion. Segun e mandatario a splica NoticiaCla.com, e motibo ta pasobra no ta un sino mas cambio simultaneo a tuma lugar y te hasta tin chens cu lo tin mas cambio cu lo por keda presenta proximamente. E no por a corda exactamente cuanto pero tin mas. Esey ta pone cu ta parce como si fuera cu e la reta e sentencia di huez y toch dal bay cu mas cambio di destinacion. “Esey no ta e caso” Sevinger a sigui bisa.

CULPA RIBA HUEZ

Sevinger no a perde chens pa tira culpa riba oposicion den e direccion aki. “Por lo menos nos ta respeta e sentencia di huez. Huez tin rason. Huez a dicidi. Nos no a bay tene conferencia di prensa y bisa cu huez a sinta riba stul di gobierno. Nos ta acepta e sentencia” Sevinger a sigui bisa. Pa loke ta e ultimo sentencia pues, no ta conoci si lo apela esaki, y dentro di poco e decision lo wordo tuma.

E SENTENCIANAN Y MINISTER SCHWENGLE

Tabata dos siman pasa ainda cu e minister responsabel pa firma permiso di hotel, esta Alex Schwengle a declara cu e lo no a pone su firma bou di e peticion di e boutique hotel Ocean Z y tampoco lo bay haci’e. Asina e portal di e matutino Bon Dia Aruba, esta Bondia24 ta raporta e di tres siman di januari. Segun e portal, Schwengle a mustra cu e peticion enberdad ta riba su lessenaar, pero ‘cu e sentencia di hues, e (permiso) no tin balor mas’. Esey ta nifica cu por lo pronto e boutique hotel lo no haya su permiso, cu ta nifica cu e no por opera toch.

VEREDICTO DI 12 DI JANUARI

E mandatario ta basa su mes riba e sentencia di dia 12 di januari ultimo. “Hues hasta a dicta cu mester cambia e destino bek. Kico mi por haci cu e peticion e ora? Mi por mand’e bek di unda el a bin" e mandatario ta sigui bisa. E mandatario no a keda ey, sino a te hasta critica e procedura general di permiso di hotel, yamando esaki ‘anticua’, y cu ‘tin di mas departamento envolvi’. Segun e mandatario, pa ora e peticion finalmente yega na su lessenaar cu tur conseho positivo, su firma ta bira nada mas cu un formalidad.

ORIGEN DI E PROBLEMA

Segun e mandatario e origen di e problema cu Ocean Z ta, cu nunca a finalisa e parti legal di e plan di destinacion den cuadro di e Ley di Ordenanza Teritorial (aproba na 2007) y e Plan di Maneho Teritorial (ROP) finalisa na 2009. E mandatario ta splica e portal cu e ta kere cu mester un adaptacion ‘pasobra den e plan tin area destina pa zona berde/naturalesa, sinembargo ‘gobierno a duna permiso pa construi’, indicando cu gobierno mes a faya den esaki. E mandatario nunca no a sconde cu varios caminda, ta Gobierno ta esun cu tin e problema cu e.o. burocracia y cu ta p'esey el a drenta politica pa yuda drecha esaki. E mandatario ademas a mustra cu e ta solamente un persona y cu si tur conseho ta positivo, e ‘no por nenga sin base’.

CONSEHO DI MINISTER

E portal a splica cu a puntra e mandatario si a discuti e problema di Ocean Z den Conseho di Minister, riba cual e mandatario a admiti cu si. “Si, nos a discuti e caso. Pero atrobe, mi ta un minister so,” indicando cu nos no por haci nada.