Minister ta clarifica 'cobransa di suma' di Serlimar via belasting

ORANJESTAD – Gobierno no ta bay manda e cobransa di 27 florin di Serlimar den belasting. Por lo menos, no segun minister Benny Sevinger. E mandatario a admiti na NoticiaCla.com dialuna cu enberdad diabierna den parlamento durante tratamento di presupuesto, y contestando preguntanan, el a haci mencion di ‘un posibilidad manera cu a sosode na Corsou cu si a pone e cobransa den belasting’. “Pero mi no tin’e riba mi lista” Sevinger a bisa indicando cu e no ta planea pa haci tal. Loke si tin cu haci, ta bin cu un manera cu e mayoria grandi di persona cu por paga e suma, paga esaki pronto. Mientrastanto gobierno lo sigui subsidia e loke e por, pa sigura cu e compania sui generis por sigui cumpli cu su compromisonan.

SERLIMAR HACIENDO BON TRABOU

Los di e cobransa, Sevinger tabatin elogio pa e trabou cu Serlimar a bin ta haci, cu fondonan limita ultimo tempo. “Nan ta haciendo un bon trabou cumpliendo cu nan tarea” Sevinger a bisa. For di momento cu e compania a cuminsa manda cobransa aña pasa pa su clientenan, e reaccion no tabata mucho grandi. Y e hecho cu sindicatonan y otro instancia a pidi pa no paga ainda, no a yuda tampoco. Asina mes e compania a sa di paga nan debenan, haci nan inversionnan y percura pa maneha cu e poco cu nan tabatin segun Sevinger.

BEL DI ALARMA

E compania sinembargo no por sigui asina y como tal gobierno tin cu wak den un tempo no defini, (e mandatario no por a duna un tempo specifico di cuanto tempo e compania tin prome cu e bati e bel di alarma), soluciona e problema financiero. Aworaki esey no por ainda pasobra tin mucho polarisacion y no tin un draagvlak pa bin cu un idea cu tur hende por biba cu ne. Fraccion di MEP a entrega un mocion berdad pa un solucion pa esnan di clase medio, pero no ta bin cu un solucion pa resolve e otro parti, esta con pa percura pa e clase cu si por paga, cumpli cu esaki. E fraccion a pidi pa reduci e suma di pago te na 10 florin, siendo cu di otro banda kier pa e trahadonan si wordo paga nan salario etc, pues e fraccion segun Sevinger no ta yudando mucho.