CAFT: Pa awor lo no conseha pa tuma medida contra Aruba

ORANJESTAD – “ Colegio di Supervision Financiero di Aruba (CAFT) lo no conseha Conseho di Minister (di Reino) pa esaki tuma medida”. Esey e colegio a bisa NoticiaCla.com awe mainta. Motibo segun e colegio ta cu ‘ta premira cu denter di poco lo finalisa e tratamento (di e presupuesto)”. Pues como tal no ta mira necesario pa tuma medida. Mes momento CAFT no a bisa si mirando cu e ultimatum (manera cu nan mes a ilustra diabierna ultimo) a wordo extendi y si gobierno a pidi un extencion pa esaki. E hecho cu no ta tuma medida (aworaki) ta basa cu ta tratando e presupuesto, pues ta duna nan e beneficio. Loke CAFT no a bisa si, ta si e contenido no ta cuadra segun nan recomendacion, si nan lo actua. Pa aworaki, CAFT ta simplemente warda e tratamento y wak con e presupuesto final lo keda, cu nan tin cu scrutina unabes aproba. 

TA TRATANDO MEDIDA

Segun CAFT, nan a tuma nota cu “ e presupuesto ta na Parlamento caminda e ta den tratamento. Considerando esaki, Caft lo informa Conseho di Minister di Reino tocante e desaroyo aki, pero pa awor aki e lo no conseha Conseho di Minister si Reino pa esaki tuma medida” e colegio a bisa pues.

ULTIMATUM

Tabata diabierna ainda cu NoticiaCla.com a raporta cu contrario na pensamento di Parlamento di Aruba y gabinete Mike Eman II, e fecha di 31 di januari awor ta keda vigente como e ultimatum, pa e presupuesto 2016 ta aproba. Asina presidente di 'College Aruba Financieel Toezicht', Age Bakker a sigura NoticiaCla.com diabierna mainta den un serie di pregunta y contesta. Mes momento sinembargo, CAFT  ta bisa di ta dispuesto pa extende e ‘deadline’ cu maximo un siman. “Si e dura mas largo cu esey, lo bin un otro conseho (di CAFT pa Conseho di Minister di Reino).”

FECHA LO NO TA VALIDO MAS

Tabata e siman aki cu varios Miembro di Parlamento, incluso propio Presidente di Parlamento Marisol Lopez Tromp a bisa NoticiaCla.com cu e fecha di 31 di januari no ta un punto pa nan. Nan ta trata e presupuesto conforme nan forma y si e pasa e fecha ey, ‘so be it’. Otro Miembronan di Parlamento a bisa NoticiaCla.com cu e fecha ey no ta importante mas. Es mas, uno a bay asina leu di bisa cu segun su combersacion cu CAFT, cu e fecha ey no ta existi mas. “Nos lo trata e presupuesto den tur trankilidad, pa e keda bon. No tin fecha di 31 di januari poni como deadline,” e Parlamentario aki di fraccion di AVP a bisa NoticiaCla.com. Awor ta resulta cu esey no ta berdad, y cu CAFT ta para ariba cu e deadline ta keda vigente.

EXTENSION POSIBEL

E pregunta haci tabata uno simpel, esta si e fecha di 31 di januari ta valido ainda pa e presupuesto keda cla y aproba. E contesta tabata ‘si’. Consecuentemente kier sa e ora kico ta pasa si e fecha ey pasa y ainda no tin un presupuesto aproba. “Nos lo meld esaki na Conseho di Minister di Reino.” Su tras, CAFT a bisa tambe cu “lo bay di acuerdo pa recomenda un ‘extension’ di tempo pa keda cla cu e presupuesto ‘riba termino hopi cortico’. “Esey kiermen, dentro di algun dia, mas tarda otro siman.” Si resulta cu Parlamento no logra pasa e presupuesto pa e tempo ey, y cu sigui mas largo cu esey, CAFT ‘lo duna otro conseho’ (na Conseho di Minister di Reino).

CONTENIDO MESTER CUADRA 

CAFT tabata hopi cla si, cu mientras cu lo por duna un extension pa caba cu e presupuesto, e contenido si mester cuadra. Manera ta conoci, CAFT a duna su conseho riba e presupuesto y cu ne, e cambionan cu e kier mira den e presupuesto. “CAFT lo duna su conseho riba e presupuesto aproba, y mira kico Parlamento a haci cu e consehonan y recomendacionnan di CAFT,” e colegio a sigui bisa. “ E conseho ey por wordo manda tambe pa Conseho di Minister di Reino,” e colegio a finalisa bisando.

CAFT A DUNA MUCHO ESPACIO SEGUN BOSMAN

Parlamentario Andre Bosman a bisa diabierna ainda tambe cu  'College Aruba Financieel Toezicht' a duna Gobierno di Aruba mucho hopi espacio caba pa keda cla. “Si e presupuesto no ta aproba pa 31 di januari, mi lo laga mi voz resona. E cos aki no por. Ta haci palabracion y atrobe nan no ta cumpli.” Asina parlamentario pa Tweede Kamer Andre Bosman (VVD) a bisa NoticiaCla.com diabierna. Segun Bosman, su problema principal ta e incumplimento pues. Y e presupuesto unabes cu e ta aproba, e mester cumpli te na e ultimo letter cu loke cu CAFT a sugeri.

ARUBA ATROBE NO TA CUMPLI CU DEADLINES

E hecho cu CAFT, den su comentario na NoticiaCla.com, a bisa cu si Parlamento di Aruba no cumpli cu e fecha di 31 di januari, cu e ta haya uitstel, Bosman no ta di acuerdo. “E ta hopi frustrante. Mi ta bisa cada bes cu nos ta pone deadlines y cada bes nan no ta cumpli. E cos aki mester caba,” Bosman a bisa. Y pa loke ta VVD, e fecha ta keda 31 di januari pa presupuesto di Aruba di 2016 ta aproba. “Si nos keda pospone cada bes y nos duna un dede y nan ta gara nos brasa, esaki no por. Esaki ta basta!” un Bosman basta indigna a bisa. Y segun Bosman, si no keda cla na tempo cu e presupuesto, e ora tin mas problema. E problema na Aruba e ora ta mas grandi cu nos kier realisa.

PRESUPUESTO NA ORA OF CORECTO

Ora cu a puntra Bosman kico ta mas importante, esta tin un presupuesto cla na tempo pero incorecto, of uno cu a tarda un poco mas pero cu su contenido ta realistico, e parlamentario a simplemente bisa cu Gobierno di Aruba mester tin berguensa di su mes. “Nan mester tin berguensa cu nan no por tin e presupuesto cla na tempo. Nan tabatin henter aña pa logra esaki, y a haci varios palabracionnan hopi cla. Prome Minister Eman a bisa cu e ta bin cu un presupuesto balansa, pero cada bes ta presta pa no cumpli cu esaki. Cada bes ta bin posponemento. E cos aki ta simplemente scandaloso. Y bo por wel di bisa cu bo kier un bon presupuesto, pero Gobierno mester tin un berguensa grandi.”

PODER DI BOSMAN COMO PARLAMENTARIO 

Pa esnan cu ta kere cu Bosman no tin poder, y cu e ta papia pa su mes, e la splica cu e no ta un persona so. “Mi ta vocero di e fraccion di VVD, esun mas grandi den Parlamento di Hulanda. Banda di esey, mi ta papia cu Minister Presidente (Mark Rutte), y nos ta bay combersa fuertemente cu otro.” Bosman a finalisa bisando.