Aruba den top 3 islanan di carnaval pa bishita segun USATODAY

NEW YORK – E corant internacional mericano USA TODAY a nombra e carnaval di Aruba como e di 3 miho pa bishita den Caribe, despues di Trinidad y Puerto Rico. Interesante ta cu a laga Corsou afo y a inclui Bonaire na number 7. Otro islanan den region cu a aparece riba e lista ta Dominica, Jamaica, St Kitts, St Lucia, Republica Dominicano y Bahamas ta finalisa e lista.

DESCRIBIENDO CARNAVAL DEN REGION

E corant ta uza e criteria, pa esnan cu ta planeando un vacacion caribense cu ta coincidi cu e region su carnaval, cu esey ta duna e vacacion un balor agrega. “Mientras cu durante un siman di carnaval e bishitante por disfruta tambe di e beachnan bunita y e escena nan tropical, nan por forma parti tambe di e nivel di fiesta door di participa den e cantidad di actividadnan carnavalesco”.

CRITERIA PA ARUBA

E corant ta raporta di Aruba cu e isla ta ‘kick off’ nan carnaval despues di aña nobo cu un parada di antorcha y ta sigui cu e celebracionnan te cu diaranson di shinishi. “Durante e periodo aki tin actividadnan festivo (manera Jump Up), musica di steel band, roadmarch cu ta zona den cayanan di Oranjestad, e capital. Un di e realse ta e Lighting Parade, cu ta presenta costume decora cu lusnan chikito”.