Parke Arikok den Corte pa disolve contracto cu su director

ORANJESTAD – Directiva di Parke Arikok awe mainta ta purbando di termina e contracto cu e director actual Emil ter Horst, mientras cu e director tambe tin un caso pa bringa esaki. Segun presidente di e directiva Greg Peterson, e por a bisa solamente cu ta trata di un caso di disolve e contract (di e director). “Nos no por bay prensa den e fase aki” Peterson a sigui bisa. E director a keda apunta apenas na october di 2014 y awor tin problema cu e directiva.

CASONAN ANTERIOR

Segun e portal Bondia24, esaki no ta e prome biaha cu algo asina ta sosode den e parke. Nan ta haci mencion di 4 instante caba den pasado cu e directiva kier y a manda e director respectivo cas. E ultimo tabata Diego Marquez cu no a keda hopi na e parke, y a bay pa motibo di diferencia di opinion. El a keda reemplaza na fin di october 2014 cu ter Horst. Pero awor e tambe ta parce di lo tin cu traha caminda pa un otro director. Peterson a splica cu despues di e caso, lo por tin mas informacion.

TER HORST

Ter Horst segun e directiva e tempo ey, a bisa cu tabatin hopi experiencia riba e tereno pa cual el a wordo apunta e tempo ey. Bibando na Aruba for di 2013 y casa cu un huez, y tin 2 yiu cu ta studiando afo. E meta principal cu ter Horst a haya ora cu el a cuminsa su funcion, tabata pa fortifica e fundacion su parti financiero, administrativo y di e personal. Unabes e logra completa esey, ‘e lo a bira e counterpart perfecto pa e expertonan di Parke Nacional Mericano, pa delinea un plan strategico di 10 aña pa e parke.

FUNDACION DI E PARKE

E parke mes a bira un fundacion oficial na 2003 despues cu a 2000 gobierno pa decreto ministerial a establece e parke su existencia, despues cu na 1997 un comision a skibi y documenta e maneho di e parke. NOTA. E foto ta saca riba dia cu e directiva y gobierno a presenta e director e tempo ey. Drpd Glenn Thode, minister Mike de Meza, Emil ter Horst y Greg Peterson.