Tratamento di presupuesto a sigui den Parlamento dialuna

ORANJESTAD – Tratamento di presupuesto 2016 a continua awe mainta den Parlamento, drentando e di dos siman, cu ta nifica cu e no a caba prome cu e fecha cu Parlamento a haya pa keda cla cu ne. Por lo menos segun e colegio di supervision financiero di Aruba CAFT. E fecha cu nan a duna tabata 31 di januari, cu tabata diadomingo. Parlamento sinembargo a mustra caba cu nan lo trata e presupuesto riba nan speed y caba ora cu nan caba. Gobierno di su banda tambe a mustra cu nan no tin pura. Segun presidente di Parlamento Marisol Lopez Tromp, e ta premira cu pa mas tarda diaranson awor e tratamento ta caba, pa despues votamento tuma lugar. Awe (lesa otro articulo) CAFT a declara cu nan no tin problema cu a pasa e deadline, mirando cu ta tratando e presupuesto. Y basa riba esey, nan no ta conseha pa tuma medida, por lo pronto. 

PALABRACION CU CAFT

Pa loke ta e contenido, gobierno a bisa caba cu nan tin un palabracion cu e colegio financiero unda cu nan lo topa cu nan na mei proximo pa delibera riba e resultado di e prome cuartal y mira si nan tin cu adapta un ke otro di e presupuesto. Motibo principal di esaki cu pa e ora ey nan lo sa si e deal di e refineria ta logra of no y ki impacto esey por tin. A bisa caba cu a para e introduccion di Algemene Bestedings Belasting (riba orden di prome minister Eman), y ta uza e reapertura di e refineria como fondo pa por remedia e deficit. E decision riba e refineria ta cay fin di maart y pa e ora ey mester sa kico ta kico. Si dado caso no logra e reapertura, lo tin cu busca otro forma pa genera fondo y ta esey lo keda presenta y discuti cu CAFT na mei proximo, segun minister di finanzas Angel Bermudez.

BOSMAN

Diabierna ultimo parlamentario Hulandes Andre Bosman (VVD) a bisa NoticiaCla.com cu si pa e fecha di 1 februari no tin un presupuesto aproba, e lo haci tur intento pa bati porta di gobierno di Reino pa reclama un ke otro. “Pasobra no por ta asina cu cada bes ta pone ultimatum y no ta cumpli cu ne” Bosman a bisa. Ademas e contenido tambe mester ta conforme e sugerencia y conseho di e colegio financiero.