Menos detencion durante Lighting Parade

ORANJESTAD - 'Un berdadero record, pero di un forma masha positivo', asina Lito Lacle, Vocero di Cuerpo Policial Aruba, a duna di conoce despues di e parada di luz di Oranjestad. Cu cantidad di hende riba pia, tanto den parada como den banda, toch e comportacion tabata hopi miho cu otro añanan. "Figura Bo cu nos a raporta casi 72% menos detencion cu aña pasa!"

CIFRANAN DI COMPARACION

Durante e anochi di Parada di Luz di Oranjestad na aña 2014 tabatin 20 detencion y Afl. 6950,= na multa. Aña pasa e cantidad a baha na 14 detencion, cu a produci Afl. 6270,= na multa. Sinembargo, cu un trabou grandi di prevencion y conscientisacion, e comportacion a mehora di tal forma cu a detene solamente 4 sospechoso y e multa tabata unicamente Afl. 1000,=.

MAS POLIS RIBA CAYA

Di parti Cuerpo Policial Aruba, a percura pa un cantidad di Polis riba pia, tanto den e parada, como pafo di e parada y den e Warda nan di Polis pa coordina e strategia planea adelanta. Cu e resultado riba mesa, ta obvio cu e "draaiboek" di Polis a funciona hopi bon, den cual a saca e parada na ora, cab'e na ora y percura pa e publico grandi a yega e parada bon y a bay cas bon bek. E parada a sali na ora y pa 12:25am e prome grupo a yega final, mientras cu e ultimo grupo a termina 1:50am cu ta precisamente den e ora stipula.