14 detencion y 3500 na multa durante Jouvert Morning

ORANJESTAD - Policial Aruba tabatin no menos cu 158 Polis riba pia, cu a percura pa saca e parada di Jouvert Morning pa exactamente 4:05 am y di cual e prome grupo a yega pa 7:30 am y e parada completo a termina pa 8:30 am. E aña aki tabatin 14 detencion cu ta un poco mas cu aña pasa, unda tabatin 12 detencion durante e mesun evento. E parada di Jouvert Morning a sali for di Joe Laveist Sport Park, pasa den Pastoor Hendrikstraat, Caya Dick Cooper, Caya Captain Rodgers, Lagoweg, Bernhardstraat, Vuylestekenstraat, Pastoor Hendrikstraat, Lagoweg y caba bek na Joe Laveist Sport Park.

CANTIDAD DI BANDA 

Na tur tabatin 11 banda musical participando den e parada y 1 DJ, cu riba su mes ta hopi mas musica di locual a custuma e ultimo añanan. A stel op entre e oficina di Elmar y YMCA na San Nicolas. E secuencia di e bandanan tabata 4 Real, Dushi Band, Youth Extreme, D'Licious, Flashback Band, Mike's Disco, N'Fuzion, OREO, NBO, The Failures, BMW y Tsunami.

GRUPONAN FOR DI MAN

Aunke cu mayoria di esunnan gosando den e parada y mirones na banda a comporta bon, toch semper tin un grupo cu ta bay for di man. Pa nan Polis tabatin un ekipo special cu ta percura pa nan detencion mesora. Hunto cu Ministerio Publico a aplica e maneho di "Faya bo Haya" pa cual ta duna Bo un multa halto pa paga pa bo libertad, sino bo ta keda encarcela.

DETENCIONAN

E detenidonan tabata G.G.L. (21 aña) cu a keda deteni precisamente riba su fecha di hacimento di aña; J.A.P (33 aña), T.D. (22 aña), I.T.G.dC (22 aña), H.L.H. (25 aña), B.J.B. (20 aña), A.C.J. (54 aña), J.M.R. (20 aña), E.A.P.C. (42 aña), J.M.R.F. (32 aña), K.C.A. (22 aña), R.A.Q. (32 aña), C.A.vdL. (20 aña) y J.J.S. (16 aña). E delitonan cometi ta varia entre buracheria publico, insulto di un agente di Polis den funcion di su trabou, no sigui ordo di Polis, bringamento, posesion di arma y strobamento di e parada. E multa mas abou tabata di 200 florin mientras cu esun mas pisa pa e sospechosonan ariba menciona tabata di 500 florin. Di e 14 detenidonan, un total di 9 a haya multa cu na tur a suma Afl. 3500,=.

AREA CAYENTE 

Mester menciona cu e area "cayente" tabata den vecindario di Carnival Village, mientras cu a detene sospechosonan tambe den vecindario di Cunucu Rum Shop, Wan Tu, Psstoor Hendrikstraat y hasta dilanti Warda di Polis San Nicolas.

SIGUIENTE ACTIVIDAD

E siguiente evento pariba di brug lo ta e parada di luz cu ta tuma luga diahuebs awor dia 4 di februari entre 8:00 pm y 2:00 am cuminsando y cabando na Joe Laveist Sport Park na San Nicolas. Ta corda tur hende pa gosa hopi, pero na midi. Corda pa tin un chauffeur asigna pa stuur despues di e evento, si acaso bo lo consumi alcohol durante e parada.