Aruba ta refuta keho di Hulanda cu nos no ta prepara pa Zika

ORANJESTAD – Epidiomologo Maribel Tromp a desmenti cu Aruba no ta haciendo suficiente pa combati e virus di Zika. Riba pregunta di NoticiaCla.com diabierna, cu Minister Hulandes di Salubridad, Edith Schippers a critica e.o. Aruba pa su maneho, Tromp a refuta e acusacion aki. “ Mi ta kere cu nos ta riba nos alerta di mas halto di e protocolnan cu nos tin.” Tromp a sigura NoticiaCla.com. A mustra te hasta, cu porta Hulanda no ta na altura di loke cu Aruba ta haciendo. “Mi ta kere cu esey no ta berdad,” Tromp a sigura, contradiciendo e mandatario Hulandes su declaracion.

HACIENDO BEST PA ELIMINA SANGURA

“Nos ta haciendo nos best pa cu e eliminacion di e sangura. Esey ta e mensahe y e trabou cu tin cu wordo haci eigenlijk” Tromp a bisa. “Nos ta tratando un caso sospechoso manera un caso. Nos ta zorg pa e populacion adulto (di e sangura) gewoon ta hopi abou.” Si no tin e sangura, y tin un caso importa, no tin transmision posibel segun Tromp. Esey ta nifica cu bo ta keda na limitacion di e caso. El a ripiti e ora cu loke cu Hulanda ta bisa no ta corecto.

DIFERENCIA ENTRE ARUBA Y ISLANAN BES

Hulanda a mustra tambe cu nan a manda material y persona pa islanan BES, pa asina nan por controla y test casonan di Zika miho y mas liher. Riba esey, Tromp a mustra cu na Aruba esey no por bay asina. Aruba ta keda un pais riba su mes, y Bonaire ta netamente un teritorio Hulandes, unda cu nan por haci mas cos cu na Aruba. “Nos no tin e coneccion. Esey ta BES eilanden. Nos mes tin cu percura pa nos cosnan. P'esey nos ta manda e muestranan Hulanda y nos tin un GKMB cu ta 'fully equipped' pa haci su trabou,” Tromp a sigui bisa. Un test pa Hulanda ta dura 3 dia pa haya e resultado. E motibo cu ta mand'e Hulanda ta pasobra eynan nan ta haci e test tipo PCR, cu ta un technica cu ta wordo aplica pa un aparato cu no tin ainda riba e islanan den Caribe, mirando su costo halto. Y 'test kit' pa test riba cirologia, ainda no ta disponibel mundialmente pa Zika pasobra e ta hopi no specifico.

KEHO DI HULANDA RIBA ARUBA

Aruba, Corsou y St Maarten tin cu haci mas esfuerso pa combati e virus di Zika. Asina Minister Hulandes di Salubridad, Edith Schippers a recomenda diabierna. “Nos ta trahando duro riba un implementacion di 'International Health Regulations'. Riba islanan BES nos a logra esey. Pero e otro islanan mester echt haci lihe,” Schippers a bisa. Esaki ta contradeci palabra di Minister Arubano Alex Schwengle, cu a bisa e siman aki ainda cu Aruba ta haciendo tur cos pa combati e virus.  Te cu ayera, nan a sigura NoticiaCla.com cu ainda no tin ningun caso di Zika riba e isla. Corsou di otro banda, tin su prome caso local y tambe uno importa. Mescos cu tur otro conseho, Schippers a conseha awe mainta (prome cu e drenta Conseho di Minister) cu no mester biaha pa e region aki si bo ta na estado, y si toch bo mester, tuma e precaucion necesario.