Total di 13 caso sospechoso di Zika manda pa Hulanda pa verificacion

ORANJESTAD – Mientras cu no tin ningun caso confirma di Zika, tabatin 40 caso sospechoso cu a keda raporta, di cual 13 di e casonan aki a bay Hulanda pa haci prueba. Den e 40 casonan cu tabata sospecha pa Zika, a resulta cu den nan tabatin casonan tambe di Dengue y Chikunguya. E Departamento di Salud a presenta un bista di kico tur ta pasando na Aruba rond di e virus di Zika. Fuera di esey, no tabatin nada nobo cu por a raporta, fuera di cifranan cu tin aworaki di casonan cu a keda raporta, pero no confirma. Ta tumando medidanan di prevencion claro, ora cu sinti cu e personanan en cuestion por tin e sospecho di Zika.

PERSONANAN CU TA BISHITA PAISNAN CU TIN ZIKA

Personanan cu a bishita paisnan cu ta conoci cu tin Zika, a raporta y splica kico nan a haya y a mustra tambe cu nan tin simptoma. A haci testnan cu e personanan aki, pa wak si nan tin sea Dengue of Chikunguya, pasobra e testnan inicial tin cu determina esey. Si e no resulta den e dos casonan ey, ta sigui check pa Zika.