E cuater Parlamentonan ta 80% di acuerdo cu e concepto pa e 'geschillenregeling'

ORANJESTAD – E cuater Parlamentonan ta 80% di acuerdo, cu e concepto pa e 'geschillenregeling'. Por lo menos ta pensamento di miembro di Tweede Kamer Andre Bosman (VVD) na NoticiaCla.com. E proposicion (cu Minister Hulandes Ronald Plasterk a bin cu ne pa loke ta un 'geschillenregeling') ta uno bon. Asina Bosman a sigui bisa diabierna. "Ta miho cu bo tin algo, en bes di nada. Bo por bringa pa bo haya bo gana 100%, cu ta bon, pero mientrastanto bo no tin nada awor." Pa Bosman, e ta prefera tin algo 80% en bes di tin nada.

KICO TA E SITUACION

Bosman a recorda cu IPKO no ta un organo decisivo. Loke ta pasa durante e reunionnan ey, ta cu ta palabra con ta sigui. Na final ta e Conseho di Minister Hulandes ta esun cu tin cu negosha. “Nos a duna un direccion, y e Conseho di Minister ta bay negosha. Finalmente tur Conseho di Minister mester yega na un acuerdo. Laga nan negosha,” Bosman a bisa. Laga nan negosha y wak unda y con nan ta sali afo. “Nos tabatin algun direccion y mi ta reconoce algun punto den dje.” Segun Bosman, e ta considera 'Raad van State' independientemente suficiente, locual e islanan di Caribe no ta comparti cu ne.

PAPIA NA NOMBER DI VVD

Bosman a sigura tambe, cu e ta papia na nomber di e fraccion di VVD, pero ey tambe e ta papia pa su mes y e voz no ta definitivo. “Pasobra mi tin cu papia tambe cu mi fraccion.” Tambe e parlamentario a bisa, cu no ta asina leu caba cu por papia di un compromis entre su fraccion y e fraccion di PvdA, pasobra Plasterk como minister no a haci ningun presentacion oficial pa Parlamento debati ariba. Ta un carta el a presenta, pero nada no a keda presenta. “Nos por grita cuanto cu nos kier awor, pero e mester wordo presenta oficialmente den Parlamento.”