Aruba no ta acepta proposicion di Plasterk riba geschillenregeling

ORANJESTAD – E proposicion di e siman aki di Minister Hulandes, Ronald Plasterk riba 'geschillenregeling' ta wordo rechasa pa Parlamento di Aruba. Esaki lider di fraccion di AVP Rene Herde a confirma na NoticiaCla.com diahuebs. El a tuma nota riba NoticiaCla.com di e carta di Plasterk na 'Tweede Kame'r riba e topico y a nota cu un biaha mas, Plasterk no ta cumpli cu e peticion di e 4 Parlamentonan di Reino Hulandes. “Plasterk kier un conseho di 'Raad van State', cu ta bay 'Rijksministerraad' y eynan nan ta dicidi,” Herde a sigui bisa. Esey ta algo cu e parlamentarionan no por bay di acuerdo cu ne. Herde ta recorda cu e cuater parlamentonan kier pa Hoge Raad dicta un sentencia den un caso di un 'geschil'. De hecho, Herde ta remarca cu e 4 puntonan cu e parlamentonan a sugeri, Plasterk no ta cumpli ni cu un di nan!

PLASTERK NO KIER CUMPLI

Pa e motibonan aki, miembro di su propio partido Roelof van Laar (PvdA) a entrega un mocion na september aña pasa, cu a haya aprobacion di mayoria di 'Tweede Kamer', cu mester bin un areglo cu mester cumpli cu e 4 puntonan. December atrobe Plasterk a manda un proposicion cu no ta cumpli, y e siman aki atrobe, Plasterk a bolbe haci mescos. “Nos ta lamenta cu e proposicion cu el a bin cu ne no ta cumpli. Plasterk djies ta pone tur hende un banda. Esey kiermen cu nos tin un problema den Tweede Kamer!” Loke tambe ta straña Herde, ta cu Parlamentario Andre Bosman cu tabata presente na tur e reunionnan, no a bisa ni un palabra riba esey. “Awe cu Plasterk ta bolbe bin, e ta bisa cu e ta sostene,” Herde a bisa. Herde ta duda cu Bosman a sostene e mocion di van Laar di aña pasa.

INTERPELA PLASTERK DEN 'TWEEDE KAMER'

E palabracion riba e tema awor ta cu, si pa fin di maart awor Gobiernonan di Reino no por presenta un proposicion (y ta parce cu esey no lo bini) ta nifica cu Parlamento Hulandes, lo bay yama Plasterk pa interpela e mandatario den 'Tweede Kamer' riba e topico aki. E interpelacion no lo tuma lugar awor mesora, sin te fin di maart, pa duna e mandatario tempo, unda cu e lo haya un carta.