Ex trahadonan di Aura Casino ainda no tin claridad riba nan futuro

ORANJESTAD – Si pa diabierna no tende nada positivo riba nan situacion di trabou, e grupo di 44 ex trahado di Aura Casino lo ehecuta nan ‘plan B’. Kico esaki ta encera, nan no kier a bisa ainda. Tur esaki pasobra e ex trahadonan ainda ta den un scuridad total riba nan futuro. Cinco dia despues cu nan mester a tende ken ta esun cu ta tuma e casino over, esaki a keda na ‘aros y coco’, esta nada. No a tende nada y pio ainda, cu e casino lo a wordo bendi. Mientras cu trahadonan no por a confirma e informacion ainda, nan a tende cu esey tabata e caso. Loke si nan a confirma ta, cu a cuminsa saca cierto machinnan for di e edificio. Algo cu ta preocupanan sigur, mirando cu menos machine kier men menos trabou pa nan, y como tal no tin garantia cu tur 44 trahado por haya nan trabou bek.

SCURIDAD TOTAL

Loke mas ta preocupa e trahadonan ta, cu nan a wordo laga den completo scuridad pa loke ta informacion. Despues cu dialuna a pasa, niun hende no a tuma contacto cu nan pa actualisa e informacion, pues esey ta nifica cu no a bisa nan tampoco si un di e companianan a tuma e casino over of no. “Nada, nada” un di e trahadonan di fam Vaneyte a bisa NoticiaCla.com. Un otro trahado, sr. Romero a mustra cu dia 26 a wordo priminti cu nan lo a haya informacion di un 'update'. Pero enves di informacion positivo, el a ricibi un potret riba su telefon, di hendenan cu ta sacando e machinnan for di e casino. “Un casino sin machine no por opera!” Romero a bisa.

DPL

Un di e kehonan cu DPL (oficina di gobierno cu ta regla trabou) tabatin riba e caso aki, ta cu no obstante cu minister a duna prioridad na e caso di casino, cu e trahadonan afecta di casino, no ta acudiendo. Y tanten cu nan no acudi na DPL, nan no por wordo yuda. Algo cu e trahadonan a desmenti categoricamente. “Esey no ta berdad” e trahadonan a bisa. Segun Vaneyte, varios trahado colega a bay DPL berdad, pero tur a wordo bisa cu no tin trabou pa nan aworaki ‘pasobra tin hopi hende riba lista’. “Kiermen e otronan no ta haya e emocion pa bay,” Vaneyte a bisa. Como tal, e trahadonan no ta sinti cu na ta wordo trata cu prioridad manera cu lo a wordo priminti pa Minister di Labor Paul Croes. De hecho, tabatin 6 trahado cu tabata traha atrobe na casino (2 na uno y 4 na un otro) y segun e trahado a splica NoticiaCla.com, mesora despues cu nan a tene un conferencia di prensa recientemente, tur 6 trahado a wordo kita for di trabou e mesun anochi. “Kiermen no ta un casino a kita pasobra el a bay malo. Bo wak bon, ta manera un style cu nan kier laga nos hermeticamente den silencio, 'bloeddood',” Vaneyte a sigui bisa. Ta sperando pa awe diabierna pa tende algo, sino nan ta ehecuta nan plan di accion, considera como plan B. No ta conoci pa NoticiaCla.com kico e plan aki ta.