CAFT: Deadline pa presupuesto 2016 ta keda 31 januari

ORANJESTAD – Contrario na pensamento di Parlamento di Aruba y gabinete Mike Eman II, e fecha di 31 di januari awor ta keda vigente como e ultimatum, pa e presupuesto 2016 ta aproba. Asina presidente di 'College Aruba Financieel Toezicht', Age Bakker a sigura NoticiaCla.com diabierna mainta den un serie di pregunta y contesta. Mes momento sinembargo, CAFT  ta bisa di ta dispuesto pa extende e ‘deadline’ cu maximo un siman. “Si e dura mas largo cu esey, lo bin un otro conseho (di CAFT pa Conseho di Minister di Reino).”

FECHA LO NO TA VALIDO MAS

Tabata e siman aki cu varios Miembro di Parlamento, incluso propio Presidente di Parlamento Marisol Lopez Tromp a bisa NoticiaCla.com cu e fecha di 31 di januari no ta un punto pa nan. Nan ta trata e presupuesto conforme nan forma y si e pasa e fecha ey, ‘so be it’. Otro Miembronan di Parlamento a bisa NoticiaCla.com cu e fecha ey no ta importante mas. Es mas, uno a bay asina leu di bisa cu segun su combersacion cu CAFT, cu e fecha ey no ta existi mas. “Nos lo trata e presupuesto den tur trankilidad, pa e keda bon. No tin fecha di 31 di januari poni como deadline,” e Parlamentario aki di fraccion di AVP a bisa NoticiaCla.com. Awor ta resulta cu esey no ta berdad, y cu CAFT ta para ariba cu e deadline ta keda vigente.

EXTENSION POSIBEL

E pregunta haci tabata uno simpel, esta si e fecha di 31 di januari ta valido ainda pa e presupuesto keda cla y aproba. E contesta tabata ‘si’. Consecuentemente kier sa e ora kico ta pasa si e fecha ey pasa y ainda no tin un presupuesto aproba. “Nos lo meld esaki na Conseho di Minister di Reino.” Su tras, CAFT a bisa tambe cu “lo bay di acuerdo pa recomenda un ‘extension’ di tempo pa keda cla cu e presupuesto ‘riba termino hopi cortico’. “Esey kiermen, dentro di algun dia, mas tarda otro siman.” Si resulta cu Parlamento no logra pasa e presupuesto pa e tempo ey, y cu sigui mas largo cu esey, CAFT ‘lo duna otro conseho’ (na Conseho di Minister di Reino).

CONTENIDO MESTER CUADRA

CAFT tabata hopi cla si, cu mientras cu lo por duna un extension pa caba cu e presupuesto, e contenido si mester cuadra. Manera ta conoci, CAFT a duna su conseho riba e presupuesto y cu ne, e cambionan cu e kier mira den e presupuesto. “CAFT lo duna su conseho riba e presupuesto aproba, y mira kico Parlamento a haci cu e consehonan y recomendacionnan di CAFT,” e colegio a sigui bisa. “ E conseho ey por wordo manda tambe pa Conseho di Minister di Reino,” e colegio a finalisa bisando.

PARLAMENTO NO TA KEDA CLA NA TEMPO

Awe diabierna mester ta e ultimo dia di tratamento di presupuesto, segun e ultimatum. Mirando e loke cu falta ainda, y cu falta basta minister pa contesta pregunta, no ta premira cu e tratamento lo keda cla pa 31 di januari, cu ta nifica cu lo mester pidi un extension cu no mag surpasa otro siman. No ta conoci si e extension a wordo pidi caba of si e lo wordo pidi  awe den curso di dia.