APA contento con a bay cu yegada di 5 bapor crucero pa Aruba

ORANJESTAD – Aruba Ports Authority (APA) no solamente ta sumamente contento di por a ricibi 5 barco crucero riba un solo dia, pero tambe con tur cos a bay durante e dia. Manera NoticiaCla.com a raporta ayera caba, e waf di nos isla tabata completamente yen debi na e barconan crucero. Y den esaki, APA tabatin un tarea grandi. Nan a mustra cu hunto cu diferente otro instancia a haci varios preparacion pa por haci e fluho di e cantidad di turista uno mas rapido posibel. “Esaki ta hisa e nivel di servicio y brindando e turistanan mas tempo pa disfruta di Aruba y e oportunidad pa gasta mas na beneficio di e economia di Aruba.”

MAS BISHITA ASINA DEN 2016

Segun e relato di APA, durante 2016 lo ta spera mas di e dianan aki, na unda lo bay tin diferente barco crucero den waf di Aruba e.o. 9 maart 2016. Un aña cu segun reservacion haci te cu awor, ta mustra cu lo ricibi un biaha mas un total di riba 600.000 turista crucero, cual a logra tambe durante e ultimo 3 añanan.

HOPI PREPARACION PA E YEGADA

E dia di ayera tabata uno importante pa APA, unda cu for di siman pasa caba tabata prepara pa e yegada di e 5 barconan crucero dia 27 di januari 2016.

E YEGADANAN

Awe APA a relata e informacion mas detaya di e yegada di e 5 bapornan crucero. For di mainta trempan net algo prome cu 6'or, e promer barco a cuminsa drenta y ya pa prome cu 8’or e di cuatro barco crucero ta mara na Containerkade.

1)      Zenith di Pullmantur group a drenta pa 06.00or cu 1.188 pasahero crucero cu 590 tripulante. Ta un barco cu a bin di Puerto Limon, Costa Rica y lo bay Santa Martha Colombia y despues pa Cartagena y Colon Panama.

2)      Island Princess di Princess Cruises a drenta pa 06.15or cu 2.133 pasahero crucero y 917 tripulante. Ta un barco cu a bin for di Port Everglades y lo bay Cartagena, Panama Canal, Colon, Puerto Limon, Costa Rica, Grand Cayman y Port Everglades.

3)      Celebrity Eclipse di Celebrity Cruises a drenta pa 07.15or cu 2.700 pasahero crucero y 1.243 tripulante. Ta un barco cu a bin di Miami, Florida y lo sigui despues pa Corsou.

4)      Azura di P&O Cruises a drenta pa 07.45or cu 3.074 pasahero crucero y 1.166 tripulante. Ta un barco cu a bin di Corsou y lo sigui despues pa Amber Cove, Republica Dominicana, Tortola, St. Maarten, Sint Lucia y Bridgetown

Y pa 12.30or cu salida di Island Princess, e puerto di Aruba a ricibi su di 5 barco crucero pa e dia di 27 di januari 2016 cu ta:

5)      Monarch di Pullmantur group cu a drenta pa 13.00or cu 2.293 pasahero crucero y 793 tripulante. Ta un barco cu a bin di La Guaira Venezuela y lo bay despues Colon, Cartagena y Willemstad.

TOTAL CU A BISHITA ARUBA

Na tur total, Aruba a ricibi 11.388 pasahero y 4.709 tripulante cu hunto ta un total di 16.097 bishitante. Cu esaki, a casi yega e record registra di turista crucero cu a yega riba un solo dia Aruba, cu tabata dia 26 di december 2013 cu un total di 11.453 turista crusero.

FAMIA DI BAPORNAN CRUCERO

E famia di Carnival Cruises consistiendo di Carnival Cruises, Princess Cruises, Holland America Line, P&O Cruises & Aida Cruises ta keda esun mas grandi pa Aruba, cu un total proyecta pa 2016 di 152 'calls' y un cantidad di 368.000 turista crucero. E famia di Royal Caribbean ta na di dos lugar, consistiendo di Royal Caribbean, Celebrity Cruises & Pullmantur Group cu un total proyecta pa 2016 di 100 'calls' y un cantidad di 240.000 turista crucero. E otro lineanan crucero manera Norwegian Cruises & esnan di Europa manera Mein Schiff & MSC Cruises tin un total proyecta pa 2016 di 86 'calls' y 53.000 turista crucero.

COOPERACION CU OTRO DEPARTAMENTO

Riba un dia ocupa manera ayera, APA di su banda ta percura pa for di trempan, tin un bon coordinacion entre tur e departamentonan envolvi, pa e trabounan necesario por tuma lugar manera planea. A habri acceso adicional pa bus y taxi, aliviando asina e fluho di trafico. A pone extra seguridad pa controla e trafico riba tereno di waf, pa asina tin mihor control di esaki y mas seguridad pa e turistanan crucero. Tambe a percura pa e terminal y tereno riba waf tabata mas limpi posibel. Gerencia di APA ta contento con e personal di APA a haci nan trabou y ta gradici nan inmensamente pa e bon trabou. Tambe ta gradici ATA, ministerio di Turismo, DTP, DOW, Polis y tur otro autoridad cu a contribui pa e dia por a bay sublime. Tambe un gradicimento na tur tour operator, taxi y demas proveedor di servicio na turismo en general.