Cerbes Chill ta 'all in' cu Hebbe Hebbe

ORANJESTAD - E di 18 edicion di Hebbe Hebbe, ta bay ta esun di miho, segun Michel Ruiz . E representante di Cerbes Chill, a uni cu organisadonan di Hebbe Hebbe, pa anuncia e 'line-up' di artistanan pa e festival gratis, cu ta tuma luga diahuebs dia 28 di januari. Como cu tradicionalmente, e 'line-up' ta consisti di e artistanan cu a gana Caiso y Soca Monarch y teniendo cuenta, cu a cancela e festival di e aña aki, a scoge pa un combinacion di banda y artistanan cu hitnan grandi y legendario, cu ta "crowd pleasers" tradicional pa hopi aña. E bon ambiente di Hebbe Hebbe ta garantisa!

ARTISTANAN

Manuel Da Silva y Carl Michael Bikker a haci e anuncionan pa cu Hebbe Hebbe. E prome artista, Rusty cu su banda For Real, lo subi stage y cuminsa toca pa exactamente 7:57 di anochi. E artista ta conoci pa su legendario hitnan "Rusty Pot", "Teolinda", "Tighter" y "Barricade". Siguientemente, e stage ta di e finalista di Caiso 2015, esta Buddy, cu a lansa un "atoombom" na radionan, hunto cu N'Fusion pa Carnaval 62. Rey di Tumba, Jerrino “Bass” Ridderstap lo presenta cu su banda, sigui pa BMW cu nan hitnan, cu a bira "clasico" y ta wordo toca henter aña: "Do the Wiper", "Cry Cry Baby" y "Bacardi Limon Coca-Cola".

Cerando e anochi di Hebbe Hebbe 2016, organisadonan ta presenta e banda cu a gana premionan na Aruba, Corsou y Hulanda, cu tur nan hitnan di momento, incluyendo e cantica nr. 1 di aña 2016: Buleria. Special pa e ocasion aki, Buleria lo presenta diferente artista invita, pa cera e anochi cu "broche de oro".

DEDICACION

Hebbe Hebbe 2016 ta dedica na Maria Lydia "Mani" Lopez, cu lo ricibi un bunita reconocimento durante di e evento. Hebbe Hebbe y Cerbes Chill ta sigui ta partnernan fuerte, pa cu e evento aki, cu a cuminsa 18 aña pasa, chikito, riba e plenchi dilanti di Manuelito's Sports Bar y a crece y bira un di e eventonan mas gusta y miho atendi, durante di e temporada di Carnaval.

CERBES CHILL CU PRIJS SPECIAL

Michel Ruiz a anuncia, cu Cerbes Chill lo wordo bendi na un prijs fabuloso y e prome 50 cahanan, cu wordo bendi, ta bin compaña pa un regalo. E bar y cushina lo ta bon surti y hopi varia, cu prijsnan special riba tur e bebida y refresconan faborito di pueblo di Aruba, esta Cerbes Chill, Dewar's, Bacardi, un seleccion di biña, productonan Coca-Cola y refresconan Tropical. Ademas, Cerbes Chill lo tin diferente sorpresa pa publico durante di henter e evento.

SPONSORNAN

Hebbe Hebbe ta un espectaculo di musica y bon ambiente. Manuel Da Silva y su team ta gradici e sponsornan Cerbes Chill, Coca-Cola, Dewar's, Bacardi, Setar, DAL Pest Control, Crown Furniture and Electronics, Post Aruba y su servicio di E-Post, Fast Delivery y e team di Da Silva Racing.