Aruba a ricibi bishita di mas di 10.000 turista crucero diaranson

ORANJESTAD – Manera anticipa, diaranson cayanan di Oranjestad tabata congestiona di e cantidad grandi di turistanan, cu ta di bishita riba nos isla. Aruba a conta cu no menos cu 5 barco crucero mara den nos waf. E barconan Princess, Monarch, Azura, Zenith y Celebrity Eclipse a conta cu mas of menos 10,587 pasahero y 4,852 miembro di tripulacion. Esaki ta traduci sigur, na un fluho economico pa nos centro di ciudad y tur esnan cu ta depende di e bishitantenan aki.

PREPARACION

Operadornan di tour ya caba for di oranan trempan, tabata prepara y cla pa brinda nan servicio. Aunke por menciona, cu ta hopi di e turistanan a opta pa haci nan compras, prome cu nan a sali bay keiro y conoce nos isla. 

Ministerio di Turismo a bin ta anticipa e cantidad grandi di turistanan crucero pa aña 2016. ATA na su turno, a premira un crecemento di 8.6% di turismo crucero, compara cu 2015. Un cantidad importante, mirando cu ta trata di turistanan cu tin e potencial, pa bolbe bek Aruba pa un estadia mas largo. E impresion cu nos ta duna nan, riba e dia cu nan ta bishitando nos, ta uno di suma importancia.

COMENTARIO

Varios, ta e turistanan cu a comenta, cu locual nan gusta mas di Aruba sigur, ta nos localnan, y sin pensa dos biaha, sigur nan ta cla pa bolbe bishita nos.